पुणे जिल्हा बँक अध्यक्ष निवडणूक, आजी-माजी आमदार रेसमध्ये, अजितदादांसह संचालक मंडळाची बैठक
राष्ट्रवादीचे आमदार अशोक पवार, आमदार दिलीप मोहिते पाटील आणि माजी आमदार रमेश थोरात यांची नावं अध्यक्षपदासाठी चर्चेत आहेत. त्यामुळे अजित पवार कोणाच्या गळ्यात अध्यक्षपदाची माळ टाकतात, हे पाहणं महत्त्वाचं ठरणार आहे.
पुणे : पुणे जिल्हा मध्यवर्ती सहकारी बँक (Pune District Central Co Operative Bank Election)अध्यक्ष आणि उपाध्यक्ष पदासाठी आज निवडणूक होणार आहे. अध्यक्षपदी जुन्या आणि उपाध्यक्षपदी नवीन चेहऱ्याला संधी देण्याची राष्ट्रवादीची रणनीती ठरल्याची माहिती आहे. दुपारी एक वाजता निवडणूक होणार असून त्याआधी उपमुख्यमंत्री अजित पवार (Ajit Pawar) सर्व संचालकांची बैठक घेत आहेत. राष्ट्रवादीचे आमदार अशोक पवार, आमदार दिलीप मोहिते पाटील आणि माजी आमदार रमेश थोरात यांची नावं अध्यक्षपदासाठी चर्चेत आहेत. त्यामुळे अजित पवार कोणाच्या गळ्यात अध्यक्षपदाची माळ टाकतात, हे पाहणं महत्त्वाचं ठरणार आहे. बॅंकेच्या संचालक मंडळाच्या 21 पैकी 16 जागा जिंकत राष्ट्रवादीचे बॅंकेवर एकहाती वर्चस्व मिळवलं आहे. या 16 जणांना एका अपक्षाची साथ मिळाली आहे.
पुणे जिल्हा बँकेवरील संख्याबळ
राष्ट्रवादी – 17 काँग्रेस – 02 भाजप – 02
राष्ट्रवादीचे आमदार अशोक पवार यांनी भाजपच्या आबासाहेब गव्हाणे यांचा पराभव केला आहे. तर खेड येथील राष्ट्रवादीचे आमदार दिलीप मोहिते पाटील बिनविरोध निवडून आले होते. याशिवाय विकास दांगट आणि दिगंबर दुर्गाडे यांची नावंही चर्चेत आहेत. हवेलीच्या जागेसाठी झालेल्या मैत्रीपूर्ण लढतीमध्ये राष्ट्रवादीचे विकास दांगट विजयी झाले.
कोणी कुठली जागा जिंकली?
पुणे जिल्हा मध्यवर्ती सहकारी बँकेच्या निवडणुकीत राष्ट्रवादीचे आमदार अशोक पवार 73 मतांनी विजयी झाले आहेत. त्यांनी भाजपच्या आबासाहेब गव्हाणे यांचा पराभव केला आहे. तर राष्ट्रवादीचे उमेदवार सुनील चांदेरे हे 27 मतांनी विजयी झाले आहेत. चांदेरे यांनी भाजपचे आत्माराम कलाटे यांना पराभूत केलं आहे. हवेलीच्या जागेसाठी झालेल्या मैत्रीपूर्ण लढतीमध्ये राष्ट्रवादीचे विकास दांगट विजयी झाले आहेत. याशिवाय राष्ट्रवादीच्या पूजा बुट्टे पाटील आणि निर्मला जागडे यांचा विजय झाला, तर आशा बुचके यांना पराभवाचा धक्का बसला.
कोणाकोणाची बिनविरोध निवड?
प्रतिस्पर्धी उमेदवारांचा अर्ज बाद झाल्याने भोरमधून काँग्रेसचे आमदार संग्राम थोपटे (Sangram Thopate), पुरंदर हवेलीचे काँग्रेस आमदार संजय जगताप (Sanjay Jagtap) बिनविरोध निवडून आले. तर आंबेगाव तालुक्यातून सोसायटी ‘अ’ वर्ग गटातून गृहमंत्री दिलीप वळसे-पाटील (Dilip Walse Patil) यांचा एकमेव अर्ज दाखल झाल्याने त्यांची बिनविरोध निवड झाली.
उपमुख्यमंत्री अजित पवार (Ajit Pawar), खेड येथील राष्ट्रवादीचे आमदार दिलीप मोहिते पाटील (Dilip Mohite Patil), “ब” वर्गातून राज्यमंत्री दत्तात्रय भरणे (Datta Bharne), इंदापूर “अ” वर्ग सोसायटी मतदारसंघातून विद्यमान संचालक आप्पासाहेब जगदाळे यांचीही बिनविरोध निवड झाली आहे.
अजितदादांची एकहाती सत्ता
पुणे जिल्हा बॅंक ही राज्यातील सहकार क्षेत्रातील अग्रगण्य बॅंक आहे. मागील अनेक वर्षांपासून या बॅंकेवर अजित पवार यांचीच एकहाती सत्ता आहे. अजित पवारांनी त्यांच्या राजकीय कारकिर्दीची सुरुवात जिल्हा बॅंकेतून केली होती. 1991 पासून अजित पवार जिल्हा बॅंकेत आहेत. आतापर्यंत त्यांनी सात वेळा जिल्हा बॅंकेच्या अध्यक्षपदाचा मान भूषवला आहे.
संबंधित बातम्या :
अजितदादांनी ज्या प्रदीप कंद यांना ‘जागा दाखवण्यासाठी’ दंड थोपटले, त्यांनीच निवडणुकीत ‘जागा’ जिंकली
पुणे जिल्हा बँक अजितदादांच्या खिशात, एक जागा गमावली, कारण बारामतीतच 52 मतं फुटली
