साहेब, नेत्यांचे सहकार्य नाही, कुटुंबाच्या साथीने अर्जुनासारखा लढतोय; सरनाईकांची हतबलता आणि खदखद

शिवसेनेचे आमदार प्रताप सरनाईक (pratap sarnaik) यांनी मुख्यमंत्री उद्धव ठाकरे यांनी दोन पानी पत्रं लिहिलं आहे. या पत्रातून त्यांनी मुख्यमंत्र्यांना भाजपसोबत जुळवून घेण्याचं आवाहन करतानाच आपल्या मनातील खदखदही व्यक्त केली आहे.

pratap sarnaik

टीव्ही 9 मराठी डिजीटल टीम | Updated on: Jun 20, 2021 | 2:34 PM

मुंबई: शिवसेनेचे आमदार प्रताप सरनाईक यांनी मुख्यमंत्री उद्धव ठाकरे यांनी दोन पानी पत्रं लिहिलं आहे. या पत्रातून त्यांनी मुख्यमंत्र्यांना भाजपसोबत जुळवून घेण्याचं आवाहन करतानाच आपल्या मनातील खदखदही व्यक्त केली आहे. साहेब, माझ्या मागे ईडीचा ससेमिरा लागला आहे. नेत्यांचे सहकार्य मिळत नाही. मी एकटाच कुटुंबासह सात महिने लढत आहे. अर्जुनाप्रमाणे मी माझी लढाई लढत आहे, अशी खदखद प्रताप सरनाईक यांनी व्यक्त केली आहे. (i am fighting legally alone, nobody help me, says pratap sarnaik)

प्रताप सरनाईक यांनी 10 जून रोजी हे दोन पानी पत्रं मुख्यमंत्री उद्धव ठाकरेंना लिहिलं आहे. या पत्रातून त्यांनी उद्धव ठाकरेंचं कौतुक केलं आहे. त्यांच्या कामाचं कौतुक केलं आहे. मात्र, त्याचबरोबर काँग्रेस-राष्ट्रवादी काँग्रेसवर गंभीर आरोप करतानाच भाजपबरोबर जुळवून घेण्याचा सल्लाही त्यांनी दिला आहे. तसेच या पत्रातून सरनाईक यांनी त्यांची हतबलता आणि खदखदही व्यक्त केली आहे. युद्धात लढत असताना अभिमन्यूसारखे लढण्यापेक्षा किंवा कर्णासारखे बलिदान देण्यापेक्षा, धनुर्धारी अर्जुनासारखे लढावे असे मला वाटते. त्यामुळे राज्यात आपली सत्ता असताना सुद्धा व राज्य शासनाचे किंवा इतर अन्य कुठल्याही नेत्याचे सहकार्य मिळत नसताना, कुणालाही त्रास न देता मी माझी कायदेशीर लढाई माझ्या कुटुंबासह गेल्या सात महिन्यांपासून लढत आहे, अशी हतबलता आणि खदखद सरनाईक यांनी व्यक्त केली आहे.

कायदेशीर त्रास तरी थांबेल

कोणताही गुन्हा किंवा चूक नसताना केंद्रीय तपास यंत्रणांकडून आम्हाला नाहक त्रास सुरू आहे. केंद्रीय यंत्रणेचा दलाल आणि शिवसेनेमुळे माजी खासदार झालेल्या नेत्याकडून जी बदनामी सुरू आहे. त्याला कुठे तरी आळा बसेल. आम्हाला टार्गेट करताना आमच्या कुटुंबीयांवरही आघात होत आहे. एका केसमधून जामीन मिळाला तर जाणीवपूर्वक दुसऱ्या केसमध्ये गुंतवले जात आहे. त्यातून बाहेर आलो की तिसऱ्या केसमध्ये अडकवले जात आहे. हे जाणीवपूर्वक केलं जात आहे. भाजपशी जुळवून घेतलं तर हे कुठेतरी थांबेल, अशी व्यथाही त्यांनी मांडली आहे.

मंत्री आणि अधिकाऱ्यांची भाजपशी हातमिळवणी

एकीकडे आपण राजकारण बाजूला ठेवून फक्त आपल्या मुख्यमंत्रीपदाला प्रामाणिकपणे न्याय देत आहात. दुसरीकडे काँग्रेस-राष्ट्रवादीमुळे शिवसेनेचा मुख्यमंत्री झाला, असे काँग्रेस-राष्ट्रवादीच्या लोकांना वाटत आहे. त्यात काँग्रेस पक्ष एकला चलो रेची भूमिका घेत आहे. तर काँग्रेस-राष्ट्रवादी इतर पक्षाचे नेते, कार्यकर्ते फोडण्यापेक्षा शिवसेनेचे कार्यकर्ते फोडत असल्याचं चित्रं आहे. शिवाय महाविकास आघाडीतील काही मंत्री व काही सनदी अधिकारी केंद्रीय तपास यंत्रणेचा ससेमिरा मागे लागू नये म्हणून केंद्राशी नकळत छुपी हातमिळवणी करताना दिसत आहे, असा आरोपही त्यांनी या पत्रातून केला आहे. (i am fighting legally alone, nobody help me, says pratap sarnaik)