मान्सूनपूर्व वादळातच होत्याचं नव्हतं झालं, घरं गेलं आणि गोठाही गेला, वर्ध्यात अनेक ठिकाणी प्रचंड नुकसान

वर्धाः समुद्रपूर तालुक्यातील (Samudrapur) पिंपळगाव आणि धोंडगाव येथे मान्सूनपूर्व (Pre-monsoon) पावसासह वादळाने प्रचंड नुकसान केले आहे. वादळाच्या तडाख्याने शेतकऱ्यांच्या 17 गोठ्यांचे नुकसान झाले असून 10 घरांचे (10 houses collapsed) छत उडाल्याने शेतकऱ्यांचा संसार उघड्यावर पडला आहे आला. यात शेतकऱ्यांचे मोठ्याप्रमाणात नुकसान झाले. घरांची पडझड या मान्सूनपूर्व पावसातच (Rain) झाल्याने आता शेतकऱ्यांनी राहायचे कुठे आणि पोटाला खायचे काय असा प्रश्न निर्माण झाला आहे. मान्सूनपूर्व पावसाने जनावरांच्या गोठ्यांचे नुकसान तर झाले आहेच पण त्याच बरोबर घराचे छत उडून गेल्याने घरातली ठेवलेले अन्नधान्य सगळे भिझून गेले आहे.

पिंपळगाव आणि धोंडगावात वादळासह पावसाने जोरदार हजेरी लावली. पिंपळगाव येथील हनुमान मंदिरालगत शिवदास सडमाके यांच्या घरावर वडाच्या झाडाची फांदी कोसळली.

जीवनोपयोगी साहित्याची नासडी

यावेळी घरातील सदस्य थोडक्यात बचावले आहेत. मात्र, घराच्या छताचे नुकसान झाले आहे. घराचे छत कौलारू असल्याने आणि ते पावसात कोसळल्याने जीवनोपयोगी साहित्याची नासडी झाली.

शेळ्या छताखाली दबल्या

अशोक घोडाम यांच्या घराचे छत कोसळले होते, यावेळी घरात बांधलेल्या शेळ्या छताखाली दबल्या गेल्या आहेत. त्यामुळे शेळ्या जखमी झाल्या आहेत. तर बाबाराव देवतळे यांच्या घराचे छत सिमेंटच्या पत्र्याचे होते ते जुन्या कौलारू घरावर कोसळल्याने घर पूर्णतः जमीनदोस्त होऊन त्यांचे मोठे नुकसान झाले. सुरेश किन्नके, हनुमान धोटे यांच्या घराच्या भिंती वादळ आल्याने कोसळल्या आहेत. आनंद कुटे आणि भारताबाई गुरनुले यांच्या घराची टिनाची छते उडून गेल्याने त्यांचेही प्रचंड नुकसान झाले आहे.

तातडीने भरपाई देण्याची मागणी

झोपडपट्टी परिसरातील रहिवासी भीमराव तेलंग, केशव भगत, गणेश घुमडे, मधुकर कुटे, रमेश कुटे, आनंद कुटे, दीपक भगत, प्रमोद धोटे, महादेव कुटे, उमेश कोरेकर तसेच धोंडगाव येथील विजय मुनेश्वर, कवडू थुटे आदींसह नागरिकांचे मोठे नुकसान झाले आहे. नुकसानीचा पंचनामा करून तातडीने भरपाई देण्याची मागणी शेतकऱ्यांनी केली आहे.