भाजपच्या महिला नेत्याच्या कारमध्ये कोकीन, पोलिसांनी रंगेहाथ पकडलं, ड्रग्ज बाळगल्याने अटक

कोलकाता : आगामी विधानसभा निवडणुकीच्या पार्श्वभूमीवर पश्चिम बंगालमधील घडामोडींना वेग आला आहे. भाजपसह सर्वच पक्ष सध्या कामाला लागले आहेत. दरम्यान, कोलकातामध्ये एक धक्कादायक प्रकार समोर आला आहे. बंगालमधील भाजपच्या युवा मोर्चाची एक महिला नेता अडचणीत आली आहे. या महिला नेताचे नाव पामेला गोस्वामी असं आहे. पामेला हीने कारमध्ये कोकीन हे ड्रग्ज बाळगल्याप्रकरणी तिला पोलिसांनी अटक केली आहे. विशेष म्हणजे पोलिसांनी तिला रंगेहाथ पकडलं आहे (Bengal BJP Youth leader Pamela Goswami handcuffed with drugs).

पोलिसांनी कारवाई कशी केली?

पामेला गोस्वामी आपल्या कारमधून कोकीन हे ड्रग्ज घेऊन जात होती. पोलिसांना याबाबत खबर मिळाली. या माहितीच्या आधारावर त्यांनी कारवाई केली. या कारवाईत गोस्वामी रंगेहाथ पकडली गेली. पोलिसांनी कोलकाताच्या न्यू अलीपूर भागात तिची गाडी अडवली. यावेळी गाडीत तिच्यासोबत एक सुरक्षा रक्षकही होता. पोलिसांनी गाडीची झडती घेतली असता गाडीत लाखो रुपयांचे ड्रग्ज मिळाले.

पामेलाच्या मित्रालाही अटक

दरम्यान, पामेला गोस्वामीला अटक केल्यानंतर पोलिसांनी तिचा मित्र प्रबीर कुमार डे यालाही अटक केली. पोलिसांनी प्रबीरला कोलकाताच्या अलिपूर येथील एनआर एनेन्यू या भागातून अटक केली (Bengal BJP Youth leader Pamela Goswami handcuffed with drugs).

पोलिसांना आधीपासूनच पामेलावर होता संशय

ही कारवाई करण्याआधीच पोलिसांना पामेला गोस्वामीवर संशय होता, अशी माहिती समोर येत आहे. पामेला एका विशिष्ट ठिकाणी थांबायची. तिथूनच कोकीनचं देवाणघेवाण केलं जायचं. गेल्या काही दिवसांपासून पोलीस पामेलाच्या हालचालींवर नजर ठेवून होते. त्यानुसार त्यांना हळूहळू याबाबतची अधिकची माहिती मिळत गेली. अखेर आज पामेला कारमधून ड्रग्ज घेऊन जात असल्याचं पोलिसांना कळालं. त्यानंतर पोलिसांनी तिची कार अडवत झडती घेतली. यावेळी पोलिसांना तिच्या बॅगेत आणि कारच्या सीटमध्ये कोकीन मिळालं. त्यानंतर पोलिसांनी तिला अटक केली.

हेही वाचा : 52 लोक शरद पवारांना सोडून गेले, एकही आमदार झाला नाही हा महाराष्ट्राचा इतिहास : सुप्रिया सुळे