ED Action : ईडीच्या कारवाईवरुन संसदेत घमासान, राहुल गांधी म्हणतात, आम्ही घाबरणार नाही, वाचा 11 अपडेट्स

नवी दिल्ली : अंमलबजावणी संचलनालय (Enforcement Directorate) अर्थात ईडीच्या कारवाया देशभरात गाजत आहेत. काँग्रेसच्या प्रभारी अध्यक्षा सोनिया गांधी (Sonia Gandhi), काँग्रेसचे खासदार राहुल गांधी आणि महाराष्ट्रात शिवसेनेचे खासदार संजय राऊतांच्या मागेही ईडीचं शुक्लकाष्ट सुरु आहे. संजय राऊतांना (Sanjay Raut) आता 8 ऑगस्टपर्यंत ईडी कोठडी सुनावण्यात आली आहे. दुसरीकडे मागील महिन्यात दिल्लीत सोनिया गांधी आणि राहुल गांधींनाही ईडी चौकशीला बोलावण्यात आलं होतं. आता ईडीने नॅशनल हेराल्डच्या कार्यालयाला टाळं ठोकलंय. यंग इंडियाचं कार्यालयही सील करण्यात आलं आहे. सूत्रांकडून मिळालेल्या माहितीनुसार तपास यंत्रणांना हवाला लिंकडूनही काही पुरावे मिळाले आहेत.

ईडी तपासातील आतापर्यंतच्या 11 मोठ्या अपडेट्स

1. आतापर्यंत मल्लिकार्जुन खरगे यांच्या उपस्थितीत हेराल्ड हाऊसमधील कागदपत्र तपासली जात आहेत. या प्रकरणात आज रस्त्यावर आणि संसदेतही काँग्रेस नेत्यांनी जोरदार आंदोलन पुकारलं आहे.
2. तपासावेळी ईडीला हवाला लिंकबाबतही काही पुरावे मिळाले आहेत. मुंबई कोलकातामधील हवालाशी संबंधित माहिती समोर आलीय. नॅशनल हेराल्डशी संबंधित संस्था आणि थर्ड पार्टीत देवाणघेवाणीचे काही कागदपत्र हाती लागली आहेत.
3. नॅशनल हेराल्ड प्रकरणात ईडीने मल्लिकार्जुन खरगे यांनाही समन्स पाठवलं आहे. काँग्रेस नेत्यांनी संसदेच्या पावसाळी अधिवेशनावेळीत समन्स बजावण्यात आल्यानं त्याबाबत प्रश्न उपस्थित केलाय. खरगे यांनी राज्यसभेत सांगितलं की मला समन्स मिळालं आणि साडे बारा वाजता हजर राहण्यास सांगण्यात आलंय. मी कायद्याने बांधलो गेलो आहे. पण संसदेच्या कारवाईदरम्यान हे योग्य आहे का? आम्ही घाबरणार नाही, लढत राहू.
4. मध्यप्रदेशचे मुख्यमंत्री शिवराजसिंह चौहान यांनी राहुल गांधी यांच्या वक्तव्यावर प्रतिक्रिया देताना म्हटलं आहे की, आमच्यावर आरोप लावले जात आहेत. राष्ट्रध्वजाबाबत त्यांची अडचण ही आहे की नॅशनल हेराल्ड प्रकरणातील कारवाईवरुन ते सैरभैर झाले आहेत. पंतप्रधान मोदी देशहितासाठी जो कार्यक्रम हाती घेतात, काँग्रेस बरोबर त्याउलट काम करते. राहुल गांधी यांचं मानसिक संतुलन बिघडलं आहे.
5. काँग्रेसचे खासदार राहुल गांधी यांनी ईडी कारवाईवर तीव्र प्रतिक्रिया दिलीय. राहुल गांधी म्हणाले की, आम्ही पंतप्रधान मोदींना घाबरत नाही. आम्हाला धमकी देऊन गप्प केलं जाऊ शकत नाही. देश आणि लोकशाहीच्या रक्षणासाठी आम्ही आमची लढाई चालू ठेवू.
6. मंगळवारी सकाळी 8 वाजता ईडीच्या अधिकाऱ्यांनी हेराल्ड हाऊसमध्ये नॅशनल हेराल्डच्या कार्यालयातील यंग इंडिया आणि असोसिएट जर्नल प्रा. लि. च्या कार्यालयात तपास सुरु केलाय.
7. सोमवारी संध्याकाळी मल्लिकार्जुन खरगे आणि पवन बन्सल हेराल्ड हाऊसला पोहोचले आणि तासाभरात दोघे तिथून निघाले. खरगे हे यंग इंडियनचे प्रिन्सिपल अधिकारी आहेत. त्यानंतर खरगे रात्री पुन्हा हेराल्ड हाऊसला परत येणार असल्याचं वृत्त होतं. मात्र ते आले नाहीत.
8. मंगळवारी मध्यरात्री 2.45 वाजता ईडीचे अधिकारी तपासानंतर माघारी परतले. यंग इंडियनच्या ऑफिसचा एक भाग सील करण्यात आला कारण मल्लिकार्जुन खरगे तपासादरम्यान उपस्थित नव्हते.
9. बुधवारी साडे बारा वाजता मल्लिकार्जुन खरगे यांनी सांगितलं की त्यांना ईडीच्या अधिकाऱ्यांनी बोलावलं आहे. कारण सील करण्यात आलेला कार्यालयातील तो भाग उघडला जाऊ शकेल. तो हिस्सा खरगे यांच्या उपस्थितीतच उघडला जाईल.
10. बुधवारी पोलिसांकडून माहिती मिळाली होती की काँग्रेस हेडकॉर्टरवर कार्यकर्त्यांते जमायला सुरुवात झाली होती. त्यानंतर पोलिसांनी या परिसरात सुरक्षा वाढवली होती. मात्र, कुठलाही अनुचित प्रकार घडला नाही आणि पोलिसांनी तिथून अतिरिक्त कुमक हटवली.
11. खरगे दुपारी 1 वाजता हेराल्ड हाऊसला पोहोचले. ईडीचे अधिकारी आण खरगे यंग इंडियाच्या कार्यालयात उपस्थित होते. त्यानंतर यंग इंडियाच्या कार्यालयात तपासाला सुरुवात करण्यात आली.