सामान्य लोकांवर कराचा बोजा आणि स्वतःची ऐश; कंगाल पाकिस्तानी नेत्यांच्या वेतनात पाचपट वाढ, कुठून आले पैसे?
कंगाल पाकिस्तानातील नेते मालामाल झाले आहेत. त्यांच्या बँक खात्यात दरमहा मोठी रक्कम जमा होत असल्याची माहिती समोर आली आहे. आता ही रक्कम कुठून येते? असा प्रश्न सर्वांना पडला आहे.
एकीकडे पाकिस्तान महागाई, बेरोजगारी आणि कर्जाच्या दलदलमध्ये अडकला आहे, तर दुसरीकडे त्यांचे सरकार साधेपणाचा संदेश देत नेत्यांच्या खिशाला भर घालण्यात गुंतले आहेत. पंतप्रधान शहबाज शरीफ यांच्या नेतृत्वाखालील सरकारने पुन्हा एकदा धक्कादायक पाऊल उचलले आहे. स्थानिक मीडियाच्या अहवालांनुसार, नॅशनल असेंब्लीचे सभापती अयाज सादिक आणि सिनेटचे अध्यक्ष यूसुफ रजा गिलानी यांच्या वेतनात 500 टक्के वाढ करण्यात आली आहे.
इतके वेतन वाढले
आता अयाज सादिक आणि यूसुफ रजा गिलानी या दोन्ही उच्च पदांवर बसलेल्या नेत्यांना दरमहा 13 लाख पाकिस्तानी रुपये वेतन मिळेल. तर यापूर्वी त्यांना फक्त 2.05 लाख रुपये मिळत होते. हे वाढीव वेतन 1 जानेवारी 2025 पासून लागू झाले आहे.
यापूर्वीही वेतनात बंपर वाढ
ही पहिलीच वेळ नाही जेव्हा शरीफ सरकारने नेत्यांच्या पगारात इतकी मोठी वाढ केली आहे. मार्च 2025 मध्येच कॅबिनेट मंत्र्यांचे, राज्यमंत्र्यांचे आणि विशेष सल्लागारांचे वेतन 188 टक्क्यांपर्यंत वाढवले गेले होते. एवढेच नव्हे, तर खासदार आणि सिनेटमध्ये काम करणाऱ्यांचे मासिक वेतनही वाढवून 5.19 लाख पाकिस्तानी रुपये करण्यात आले आहे.
सामान्य जनता संतापली
शरीफ सरकारच्या या निर्णयांमुळे सामान्य पाकिस्तानी नागरिकांमध्ये प्रचंड नाराजी आहे. इस्लामाबादमधील एका नागरिकाने संतापाने म्हटले, “आधी हे साधेपणाच्या गप्पा मारतात, मग स्वतःच कॅबिनेटची संख्या वाढवतात आणि वेतनही पाचपट करतात. सामान्य लोकांवर कराचा बोजा आणि स्वतःसाठी ऐश, ही तर हद्दच पार झाली.”
विशेष म्हणजे, जेव्हा शहबाज शरीफ यांचे सरकार सत्तेत आले, तेव्हा त्यांच्या मंत्रिमंडळात फक्त 21 मंत्री होते. आता ही संख्या वाढून 51 पर्यंत पोहोचली आहे. एकीकडे IMF आणि वर्ल्ड बँकेकडून बेलआउट पॅकेजसाठी भीक मागितली जात आहे. तर दुसरीकडे सरकार स्वतःलाच आर्थिक फायदा पोहोचवत आहे. अशा परिस्थितीत टीकाकारांचे मत आहे की, जर हेच ‘आर्थिक सुधार’ असेल, तर पाकिस्तानला संकटातून बाहेर पडण्यासाठी आणखी बराच काळ लागू शकतो.
