नागपुरात भाजप काँग्रेसचं OBC कार्ड, विधानपरिषदेला बावनकुळेंविरोधात ओबीसी उमेदवार?

नागपूर: विधानपरिषदेच्या नागपूर स्थानिक स्वराज्य संस्थेच्या निवडणुकीत भाजपनं माजी मंत्री चंद्रशेखर बावनकुळे यांना उमेदवारी देत ओबीसी कार्ड खेळलंय. तर इकडे काँग्रेसकडून माजी राज्यमंत्री राजेंद्र मुळक यांची उमेदवारी निश्चित समजली जात आहे. त्यामुळं भाजपच्या ओबीसी कार्डला काँग्रेसनं ओबीसी उमेदवार देऊन उत्तर दिलंय. त्यामुळं या निवडणुकीत ओबीसी विरुद्ध ओबीसी असा सामना रंगणार आहे.

भाजप आणि काँग्रेसचं ओबीसी कार्ड

ओबीसींचं राजकीय आरक्षण रद्द झाल्यावर सध्या ओबीसी फॅक्टर अधिक चर्चेत आहे. गेल्या स्थानिक स्वराज्य संस्थेच्या पोटनिवडणुकीत ओबीसींच्या जागेवर भाजप आणि काँग्रेसनं ओबीसी उमेदवार दिले. त्यामुळं आगामी 10 डिसेंबर ला होणाऱ्या निवडणुकीतही ओबीसी फॅक्टर कायम आहे. भाजपनं माजी मंत्री चंद्रशेखर बावनकुळे यांना उमेदवारी देत ओबीसी चेहरा दिलाय.

बावनकुळे यांनी राज्यभर दौरे करत ओबीसींना एकत्र करण्याचा प्रयत्न केला. त्यामुळं कॉंग्रेस पुढं बावनकुळे यांचं मोठं आव्हान आहे. काँग्रेसही जशास तसं उत्तर देण्याच्या तयारीत असून माजी राज्यमंत्री राजेंद्र मुळक यांना उमेदवारी देत असल्याचं कळतंय. त्यांची उमेदवारी निश्चित झाल्यास ओबीसी विरुद्ध ओबीसी अशी लढत रंगणार आहे.

भाजपचं नागपूर महापालिकेसाठी ओबीसी कार्ड?

ओबीसींचं राजकीय आरक्षण रद्द झाल्यावर भाजप ओबीसींच्या पाठीशी आहे, या सरकारच्या नाकर्तेपणा मुळं ओबीसींचं राजकीय आरक्षण गेलं, मात्र ओबीसी म्हणून बावनकुळे यांना उमेदवारी दिल्याचं भाजपनं नाकारतंय. पण आगामी नागपूर महानगरपालिका निवडणूकीपूर्वी बावनकुळेंना तिकीट देऊन भाजपनं ओबीसी कार्ड खेळल्याची राजकीय वर्तुळात चर्चा आहे.

एकूणच या निवडणुकीत गेल्या पदवीधर निवडणुकीचा इतिहास, जिल्हा परिषद निवडणूक आणि आगामी नागपूर महापालिका निवडणुका या पार्श्वभूमीवर ओबीसी मतं आवल्याकडे कसे वळतील या अनुषंगानं दोन्ही पक्षांनी ओबीसी उमेदवार दिले. यात कुणाला किती यश मिळतं यासाठी मात्र निकालाची वाट बघावी लागेल.

इतर बातम्या:

विधान परिषद निवडणुकीत चंद्रशेखर बावनकुळेंना कुणाचे आव्हान?, काँग्रेसकडून अद्याप उमेदवाराची घोषणा नाही, तगडा उमेदवार देणार – ठाकरे

नागपूर स्थानिक स्वराज्य संस्थेची निवडणूक जाहीर, कुणाला संधी मिळणार?

BJP and Congress gave ticket to OBC candidate for Nagpur MLC Election