देवेंद्र फडणवीस राज्यपालांना…. शिंदे-फडणवीस सरकारच्या सत्तास्थापनेबाबात माहिती अधिकारात धक्कादायक खुलासा

मुंबई : एकनाथ शिंदे यांच्या बंडखोरीनंतर राज्यातील महाविकास आघाडी सरकार कोसळले. यानंतर राज्यात नव्हे शिंदे फडणवीस सरकार स्थापन झाले. या नव्या सरकारने नुकतेच आपल्या कारकिर्दीचे शंभर दिवस पूर्ण केले आहेत. यानंतर आता या सरकारच्या स्थापनेबाबत माहिती अधिकारात धक्कादायक खुलासा झाला आहे. सत्तास्थापनेवेळी देवेंद्र फडणवीस(Devendra Fadnavis ) राज्यपालांना भेटलेच नाहीत असा दावा केला जात आहे.

एकनाथ शिंदे यांच्या बंडखोरीनंतर उद्धव ठाकरे यांनी आपल्या मुख्यमंत्री पदाचा राजीनामा दिला. यामुळे महाविकास आघाडी सरकार बरखास्त झाले.

यानंतर राज्यात नवे शिंदे-फडवीस सरकार स्थापन झाले. विद्यमान उपमुख्यमंत्री देवेंद्र फडणवीस हे सत्तास्थापनेसाठी कोणत्या तारखेस राज्यपालांना भेटले याची माहिती बारामती तालुक्यातील सोमेश्वरनगर येथील माहिती अधिकार कार्यकर्ते नितीन संजय यादव यांनी मागविली होती.

यावर राजभवन कार्यालयाने उत्तर दिले आहे. देवेंद्र फडणवीस यांची राज्यपालांसोबत भेट झाल्याची नोंदच राजभवन दैनंदिन कार्यक्रम पत्रिकेत नसल्याची धक्कादायक माहिती समोर आली आहे.

28 जुन 2022 रोजी देवेंद्र फडणवीस हे राज्यपाल यांना भेटल्याच्या बातम्या विवीध वृत्तपत्रात व न्युज चॅनेलवर प्रसिद्ध झाल्या आहेत. असे असतानाही राजभवन कार्यालयाने देवेंद्र फडणवीस भेटलेच नसल्याची माहिती दिली आहे.

यामुळे देवेंद्र फडणवीस हे राज्यपाल यांना भेटल्याच्या बातम्या खोट्या असल्याचा दावा नितीन यादव यांनी केला आहे.

दुसरीकडे राज्यपालांनी नवीन सरकार स्थापनेसाठी ज्यांना निमंत्रण दिले होते. त्याची माहिती तसेच एकनाथ शिंदे यांनी सरकार स्थापनेसाठी राज्यपालांना दिलेले पत्र याची माहिती राज्यपालांनी अद्यापही त्यांच्याजवळच वैयक्तिक राखुन ठेवली असून त्यांच्याच राजभवन कार्यालयासही उपलब्ध करुन दिली नसल्याचे यादव यांचे म्हणणे आहे.

त्यामुळे ही माहिती राज्यपालांनी स्वतःजवळच ठेवण्याचे कारण काय? राज्यपालांना ही माहिती देताना नेमकी कशाची भिती वाटतेय हे वेगळे सांगायची गरज नसल्याचे नितीन यादव यांनी म्हटले आहे.