शिवाजी पार्कवर आज नवं त्रिकुट, मुंबई अन् राजकीय वर्तुळाचं लक्ष ‘या’ कार्यक्रमाकडे

गिरीश गायकवाड, मुंबईः मुंबई महापालिकेचा (BMC Election) रणसंग्राम सुरु होण्याआधी महाराष्ट्र अन् मुंबईत प्रचंड राजकीय उलथापालथी सुरु आहेत. त्यातच सणासुदीत उत्सवाचा मुलामा देत काही राजकीय समीकरणंही बदलू पाहत आहेत. आज मुंबईतील शिवाजी पार्कवरचा (Shivaji Park) कार्यक्रमही याच खेळींचा भाग आहे का, हे आगामी काळात लवकरच स्पष्ट होईल. राजकीय वर्तुळाचं या कार्यक्रमाकडे जातीनं लक्ष आहे, कारण इथे प्रथमच एकनाथ शिंदे (Eknath Shinde), देवेंद्र फडणवीस आणि राज ठाकरे (Raj Thackeray) एकत्र दिसणार आहेत.

मनसेच्या वतीने दीपोत्सवाची जंगी तयारी करण्यात आली आहे. शिवाजी पार्कमध्ये भले मोठे कंदील लावण्यात आले आहेत. झुंबर आणि इतर लायटिंगदेखील लक्षवेधी ठरतेय. शिंदे आणि फडणवीस यांच्या हस्ते या दीपोत्सवाचे उद्घाटन होईल. मुख्यमंत्री एकनाथ शिंदे दुपारी चार वाजेच्या सुमारास या कार्यक्रमाला येतील, अशी माहिती सूत्रांनी दिली आहे.

आज दिवाळीचा पहिला दिवस म्हणजे वसूबारस आहे. आजपासून मनसेच्या दीपोत्सवाची सुरुवात होणार आहे. या उत्सवाच्या उद्घाटनासाठी मुख्यमंत्री आणि उपमुख्यमंत्री यांना आमंत्रित करण्यात आलंय.

अंधेरी पूर्व पोटनिवडणुकीत उद्धव ठाकरे यांच्या उमेदवाराला सहानुभूती दर्शवण्यासाठी राज ठाकरे यांनी शिष्टाई केली. त्यानंतर भाजपने आपल्या उमेदवाराची माघार घेतली. त्यानंतर मुंबई महापालिकेत राज ठाकरे भाजपाला साथ देणार का, याकडे सर्वांचं लक्ष लागलंय.

मनसेच्या नेत्यांकडून वारंवार येणारी वक्तव्यदेखील माजी मुख्यमंत्री उद्धव ठाकरे यांच्यावर निशाणा साधणारी असतात तर सध्याच्या सरकारकडे विनंती करणारी असतात. त्यामुळे शिंदे गट आणि विशेषतः भाजपच्या बाबतीत राज ठाकरेंचा सूर मवाळ होत असल्याचे दिसून येत आहे.

एकनाथ शिंदे आणि राज ठाकरे यांच्यातील संबंध चांगले आहेत, हे सर्वश्रुत आहे. त्यातच दसरा मेळाव्यात जयदेव ठाकरे, स्मिता ठाकरे, निहार ठाकरे यांना एकनाथ शिंदे यांनी आमंत्रित केलं होतं. आता राज ठाकरे यांनाही शिंदे-भाजप महायुतीत एकत्र घेतलं जातं का, याकडे सर्वांचं लक्ष लागलंय.

राजकारणात सर्व काही शक्य असतं, असं म्हटलं जातं. त्यामुळेच आगामी महापालिका निवडणुकीत राज ठाकरे भाजपसोबत जाण्याची एक महत्त्वाची शक्यता वर्तवण्यात येतेय. त्यामुळे उद्धव ठाकरे गटाची मतं फोडण्यात भाजपा यशस्वी होऊ शकेल.