शरद पवारांची अवस्था ‘शोले’तल्या जेलरसारखी : मुख्यमंत्री

ठाणे : राष्ट्रवादी काँग्रेसचे अध्यक्ष शरद पवार यांची अवस्था सध्या शोले सिनेमातल्या जेलरसारखी झाल्याची टीका मुख्यमंत्री देवेंद्र फडणवीस (Sharad pawar Devendra Fadnavis) यांनी केली. उल्हासनगरमध्ये महायुतीचे उमेदवार कुमार आयलानी यांच्या प्रचारसभेत ते बोलत होते. यावेळी मुख्यमंत्र्यांनी (Sharad pawar Devendra Fadnavis) काँग्रेसवरही टीका केली. काँग्रेसचे नेते राहुल गांधी बँकॉकला निघून गेलेत, प्रतिस्पर्धी कुणीही राहिलेलं नाही, असं मुख्यमंत्री म्हणाले.

यंदाच्या निवडणुकीत कुणी प्रतिस्पर्धीच नसल्याने निवडणुकीला मजा येत नाही. एकीकडे राहुल गांधी बँकॉकला निघून गेलेत, तर शरद पवारांची अवस्था आधे इधर जाओ, आधे उधर जाओ, बाकी मेरे पिछे आओ, अशी झाली असून त्यांच्यासोबत कुणीच नसल्याची बोचरी टीका मुख्यमंत्र्यांनी केली.

विरोधकांच्या जाहिरनाम्याचीही मुख्यमंत्र्यांनी खिल्ली उडवली. विरोधकांनी जाहिरनाम्यात इतकी आश्वासने दिली आहेत, की ते पाहून महाराष्ट्रात प्रत्येकाला ताजमहाल बांधून देऊ, महाराष्ट्रात प्रत्येकाला चंद्रावर नेऊ, अशीही आश्वासने उद्या देतील, असा टोला त्यांनी लगावला.

यावेळी उल्हासनगरात अनधिकृत बांधकामांचा प्रश्न ऐरणीवर आला असून वाढीव एफएसआय देऊन ही बांधकामं नियमित करणार असल्याचं आश्वासन मुख्यमंत्र्यांनी दिलं. तसंच येत्या काळात उल्हासनगरात मेट्रो आणून मेट्रो स्टेशनला सिंधूनगर नाव देण्याची घोषणा त्यांनी यावेळी केली. यावेळी भाजपच्या जाहीरनाम्याचं प्रकाशनही करण्यात आलं.