Shiv Sena : शिवाजी पार्कवरील शिवसेनेची दसरा मेळाव्याची परंपरा यंदा खंडित होणार?; दसऱ्या मेळाव्यात खोडा येण्याचं नेमकं कारण काय?

मुंबई: दहीहंडी उत्सावाच्या वेळी वरळीचं जांबोरी मैदान पटकावून भाजपने शिवसेनेवर (Shiv Sena) कुरघोडी केली होती. त्याचीच पुनरावृत्ती आता दसरा मेळाव्याच्यावेळी होण्याची शक्यता आहे. शिवसेनेचा दसरा मेळावा दरवर्षी दादरच्या शिवाजी पार्कात होतो. यंदा शिवसेनेची ही परंपरा खंडित होण्याची चिन्हे दिसत आहेत. दसरा मेळाव्यासाठी शिवाजी पार्क मैदान (shivaji park) मिळावं म्हणून शिंदे गटही सक्रिय झाला आहे. दादरला दसरा मेळावा घेऊन आपणच खरी शिवसेना असल्याचं शिंदे गटाला ठसवायचं आहे. शिवाय महापालिका निवडणुका असल्याने दसरा मेळाव्यातूनच (dussehra rally) शिंदे गट निवडणुकीचं रणशिंग फुंकण्याची चिन्हे आहेत. तर, शिवसेनेचे पक्षप्रमुख उद्धव ठाकरेही दसरा मेळाव्यातून निवडणुकीचं रणशिंग फुंकणार आहेत. मात्र, शिंदे गटही शिवाजी पार्क मैदानासाठी सक्रिय झाल्याने हे मैदान कुणाला मिळणार? याकडे सर्वांचं लक्ष लागलं आहे.

येत्या 5 ऑक्टोबर रोजी दसरा आहे. या पार्श्वभूमीवर शिवाजी पार्कात दसरा मेळावा कुणी घ्यायचा यावरून शिवसेना पक्षप्रमुख उद्धव ठाकरे गट आणि मुख्यमंत्री एकनाथ शिंदे गट यांच्यात जोरदार रस्सीखेच सुरू झाली आहे. उद्धव ठाकरे गटाने दसरा मेळाव्यासाठी शिवाजी पार्क मैदान मिळावं म्हणून महापालिकेकडे अर्ज दाखल केला असताना महापालिकेकडून परवानगीसाठी हात आखडता घेतला जात असल्याचे सूत्रांनी सांगितलं. त्यामुळे महापालिका उद्धव ठाकरे गटाला की एकनाथ शिंदे गटाला परवानगी देणार? याबाबतची उत्सुकता शिगेला पोहोचली आहे.

उद्धव ठाकरे पालिका प्रशासकाशी स्वत: बोलले

दसरा मेळाव्यासाठी मैदान मिळावं म्हणून स्वत: उद्धव ठाकरे यांना लक्ष घालावं लागल्याची माहिती आहे. उद्धव ठाकरे यांनी महापालिका प्रशासक इक्बाल सिंग चहल यांच्याशी संवाद साधून दसरा मेळाव्यासाठी शिवाजी पार्क मैदान देण्याची विनंती केली आहे. मात्र, सिंह यांनी परवानगीसाठी अद्याप कोणतीही कार्यवाही केलेली नाही. त्यामुळे अनेक राजकीय अर्थ काढले जात आहेत. एकनाथ शिंदे गटाला परवानगी मिळावी यासाठी पडद्यामागे हालचाली सुरू असल्याचंही सांगितलं जात आहे.

फडणवीस मार्गदर्शन करणार?

शिंदे गटाकडून यंदा पहिल्यांदाच भव्य दसरा मेळाव्याचं आयोजन केलं जाणार आहे. शिवाजी पार्क मैदानावरच हा मेळावा पार पडणार आहे. त्यासाठी शिवाजी पार्क मैदान मिळवण्याचा शिंदे गटाचा प्रयत्न आहे. दसरा मेळाव्याच्या व्यासपीठावर मुख्यमंत्री एकनाथ शिंदे यांच्यासह उपमुख्यमंत्री देवेंद्र फडणवीसही मार्गदर्शन भाषण करणार का? याबाबत उत्सुकता लागली गेली आहे.