भारत श्रीलंका कसोटी सामना सुरू असताना अचानक अंपायर बदलला, 95 व्या षटकापूर्वी काय झालं?

IND vs SL Galle Test Umpire Rod Tucker: भारत आणि श्रीलंका यांच्यातील पहिला कसोटी सामन्याचा दुसरा दिवसाचा खेळ लंच ब्रेकनंतर सुरू झाला. कारण पहिल्या सत्रात पावसाची संततधार सुरू होती. त्यामुळे सामना सुरू होण्यास उशीर झाला. असं असताना या सामन्यात एक आश्चर्यकारक घटना पाहायला मिळाली. या सामन्यासाठी मैदानी पंच म्हणून ऑस्ट्रेलिया अनुभवी आणि आयसीसी एलीट पॅनेलचे सदस्य रॉड टकर होते. पण त्याची तब्येत अचानक बिघडल्याने त्यांनी सामना सोडण्याच निर्णय घेतला. दुसऱ्या दिवसाच्या तिसऱ्या आणि शेवटच्या सत्रात सदर प्रकार घडला. भारतीय डावाचं 95वं षटक सुरू होण्यापूर्वी हा निर्णय घेतला गेला.  लगेचच टी ब्रेक झाला  त्यांच्या जागी श्रीलंकेचे राखीव पंच रवींद्र विमलसिरी भूमिकेत आले. त्याच्यासोबत दुसरे पंच म्हणून बांगलादेशचे पंच शरफुद्दौला होते.

आंतरराष्ट्रीय क्रिकेटमध्ये सामना सुरू असताना पंच बदलण्याची स्थिती खूपच दुर्मिळ आहे. त्यामुळे अचानक पंच बदलल्याने चर्चा रंगली आहे. मैदानी पंच रॉड टकर यांना नेमकं काय झालं? हे अद्याप कळू शकलेलं नाही. त्यांच्या प्रकृतीबाबत कोणतेही अपडेट समोर आलेले नाहीत. त्यांची प्रकृती स्थिर असावी अशी आशा आहे. रॉड टकर हे 61 वर्षांचे असून आंतरराष्ट्रीय क्रिकेटमध्ये नावाजलेले पंच आहेत. त्यांच्याकडे पंचगिरीचा दांडगा अनुभव आहे. पंचगिरी करण्यापूर्वी रॉड टकर एक क्रिकेटपटू होते. गॉल कसोटी सामन्यात, टीव्ही पंच म्हणून पाकिस्तानचे अहसन रजा आणि सामनाधिकारी म्हणून झिम्बाब्वेचे अँडी पायक्राफ्ट भूमिका बजावत आहेत.

रॉड टकर यांचा पंच होण्यापर्यंतचा प्रवास

रॉड टकर यांचं क्रिकेटसोबतचं नातं खूप जुनं आहे. टकर ऑस्ट्रेलियासाठी देशांतर्गत क्रिकेट खेळले आहे. 1985 ते 1988 या कालावधीत न्यू साउथ वेल्ससाठी खेळले आहेत. त्यानंतर तस्मानियात गेले आणि 1988 ते 1999 पर्यंत खेळले. 1991 ते 1996 पर्यंत तस्मानियाचे उपकर्णधार म्हणून भूमिका बजावली. त्यानंतर 1999/200 या कालावधीत त्याने कॅनबरा कॉमेट्सचे कर्णधार आणि प्रशिक्षक म्हणून दुहेरी भूमिका बजावली. त्यानंतर खेळाडू म्हणून निवृत्ती घेतली. त्यानंतर पंचच्या भूमिकेत आले आणि 2008 मध्ये आयसीसी आंतरराष्ट्रीय पॅनेलमध्ये त्यांची नियुक्ती झाली. 2010 मध्ये आयसीसी एलीट पॅनेलमध्ये सहभागी झाले. आतापर्यंत त्यांनी 101 कसोटी सामन्यात पंच म्हणून भूमिका बजावली आहे. 110 वनडे आणि 66 टी20 सामन्यात ऑन फिल्ड भूमिकेत राहिलेत.