Shubman Gill: एकवेळ लक्ष्य सोपं वाटलं, पण…; टीम इंडियाचं नेमकं चुकलं कुठे? ‘ती’ चूक मान्य करत गिलकडून नाराजी व्यक्त
IND vs NZ Shubman Gill Statement: चार-पाच धावांनी DLSने हरलो असतो तर मोठी फजिती झाली असती, अशी शुभमन गिलने सामन्यानंतर कबुली दिली आहे.
न्यूझीलंडविरुद्धच्या दुसऱ्या एकदिवसीय सामन्यात 135 धावांचा पाठलाग करताना 26 षटकांत 7 गडी गमावून 113 धावांवर असताना पावसाला सुरुवात झाली. भारताला विजयासाठी 22 धावांची गरज होती. मात्र 15 षटके शिल्लक होती. केएल राहुल आणि आकिब नबी खेळपट्टीवर होते. राहुल 26 धावांवर आणि आकिब 1 धावेवर होता. डकवर्थ-लुईस-स्टाईलनुसार टीम इंडिया 4 धावांनी आघाडीवर होती. परिणामी, सामना पूर्ण न करता डकवर्थ-लुईस-स्टाईल पद्धतीने निकाल जाहीर झाल्यावर टीम इंडिया 4 धावांनी विजयी ठरली. यानंतर कर्णधार शुभमन गिलने प्रतिक्रिया दिली आहे. त्याने खेळामधील चूक मान्य केली आहे. तसेच एका गोष्टीवर नाराजी व्यक्त केली आहे.
सामना संपल्यानंतर शुभमन गिल म्हणाला की, कठीण धावसंख्येचा पाठलाग करताना शेवटी विजय मिळवणे महत्त्वाचे असते. खेळपट्टीवर परिस्थिती सोपी नव्हती. मला वाटते की आम्ही खूप चांगली गोलंदाजी केली. त्यांना 130-140 धावांच्या आसपास रोखणे ही चांगली गोष्ट होती. एका क्षणी आम्हाला वाटले की हे लक्ष्य गाठणे सोपे जाईल, पण आमचे एकापाठोपाठ एक विकेट्स पडत गेल्या. तरीही, शेवटी आम्ही विजय मिळवण्यात यशस्वी ठरलो.
गोलंदाजांच्या कामगिरीबद्दल बोलताना तो म्हणाला की, गुरनूरने मागील सामन्यातही खूप चांगली गोलंदाजी केली होती. जसा तो अधिक सामने खेळेल आणि त्याला अनुभव मिळेल, तसा तो त्याच्या ‘लाईन आणि लेंथ’मध्ये अधिक सातत्य आणू शकेल अशी आशा आहे. त्याच्याकडे वेग आहे, चेंडूला बाऊन्स देण्याची क्षमता आहे. प्रश्न फक्त सातत्याचा आहे; आज त्याने दाखवून दिले की, जर तो अशाच प्रकारे गोलंदाजी करत राहिला, तर तो किती दर्जेदार कामगिरी करू शकतो. त्यांच्यापैकी बहुतेकांकडे आवश्यक असलेले सर्व गुण आहेत.
शुभमन गिलने सांगितलं की, खरी गोष्ट म्हणजे दबावाखाली कामगिरी करणे. आंतरराष्ट्रीय क्रिकेट म्हणजे दबावाखाली खेळणे, अनुभव मिळवणे, सातत्याने गोलंदाजी करणे आणि कठीण प्रसंगी चांगली कामगिरी करून दाखवणे. हेच आमच्यासाठी सर्वात महत्त्वाचे आहे. खेळपट्टी नक्कीच आव्हानात्मक होती. पण मला वाटते की, शेवटी आम्ही अपेक्षेपेक्षा दोन विकेट्स जास्त गमावले. आम्हाला माहीत होते की शेवटी पाऊस येऊ शकतो. आम्ही शेवटचे जे दोन फटके खेळलो. ते अजिबात योग्य नव्हते. जर आम्ही हा सामना DLS नियमानुसार चार-पाच धावांनी गमावला असता तर तो आमच्यासाठी अत्यंत निराशाजनक अनुभव ठरला असता. पण सुदैवाने, आम्ही विजय मिळवला, याचा आनंद आहे, असं त्याने सांगितलं आहे.
