कपाटातल्या जुन्या फोनला द्या नवी नोकरी, फेकून देण्याऐवजी करा स्मार्ट वापर

आपल्या प्रत्येकाच्या घरात कुठेतरी कोपऱ्यात किंवा ड्रॉवरमध्ये एक जुना स्मार्टफोन हमखास पडून असतो. नवीन मॉडेल आलं की आपण उत्साहाने ते घेतो आणि जुना फोन अडगळीत जातो. कधीतरी त्याला विकण्याचा विचार येतो, पण चांगली किंमत मिळत नाही किंवा विकायचा कंटाळा येतो. मग तो तसाच पडून राहतो, पण विचार करा, हा ‘रिटायर्ड’ वाटणारा फोन अजूनही तुमच्यासाठी खूप काही करू शकतो! त्याला फेकून देण्याऐवजी किंवा अडगळीत ठेवण्याऐवजी आपण त्याला काही नवीन आणि उपयोगी ‘नोकऱ्या’ देऊ शकतो.

सुरक्षा रक्षक म्हणून ड्युटी

तुमच्या जुन्या फोनचा Camera अजूनही ठीकठाक चालतोय? मग त्याला तुमच्या घराचा किंवा ऑफिसचा २४ तास नजर ठेवणारा ‘सुरक्षा रक्षक’ बनवता येईल! कसं? अगदी सोप्पं! फोनला एका ठिकाणी स्टँडवर ठेवा, जिथून तुम्हाला हवा तो View मिळेल. त्याला Wi-Fi ने कनेक्ट करा आणि प्ले स्टोअरमधून Alfred Home Security Camera किंवा IP Webcam सारखं एखादं सिक्युरिटी कॅमेरा ॲप इंस्टॉल करा. झालं! आता तुम्ही तुमच्या नवीन फोनवरून कधीही, कुठूनही तिथलं लाईव्ह फुटेज बघू शकता. घरात लहान मुलं किंवा वयस्कर व्यक्ती असतील, किंवा तुम्ही बाहेरगावी गेला असाल, तर हा उपाय खूपच उपयोगी ठरू शकतो. काही ॲप्स तर हालचाल दिसल्यास तुम्हाला अलर्टही पाठवतात.

मुलांच्या अभ्यासाचा डिजिटल मित्र

आजकाल मुलांना अभ्यासासाठी किंवा काहीतरी नवीन शिकण्यासाठी ऑनलाइन साधनांची गरज लागते. पण त्यांना सतत आपला महागडा नवीन फोन देणं पालकांना सुरक्षित वाटत नाही. इथे तुमचा जुना फोन कामाला येतो! त्याला Factory Reset करा. त्यात फक्त आणि फक्त मुलांसाठी उपयुक्त असलेले लर्निंग ॲप्स, एज्युकेशनल गेम्स किंवा माहितीपूर्ण व्हिडीओज असलेले ॲप्स (उदा. YouTube Kids) टाका. महत्त्वाचं म्हणजे, त्यावर Parental Control जरूर सेट करा, म्हणजे मुलं चुकीच्या गोष्टी बघू शकणार नाहीत. झालं, मुलांसाठी एक सुरक्षित ‘डिजिटल मित्र’ तयार!

म्युझिक लव्हर

तुम्ही म्युझिक लव्हर आहात? तर जुना फोन तुमचा खास ‘म्युझिक स्टेशन’ बनू शकतो. त्यात तुमचे आवडते म्युझिक ॲप्स इंस्टॉल करा, गाणी डाउनलोड करा आणि एका चांगल्या ब्लूटूथ स्पीकरला जोडून ठेवा. आता म्युझिकचा आनंद घ्या, तोही तुमच्या नवीन फोनवर कॉल किंवा नोटिफिकेशनचा व्यत्यय न येऊ देता! तुम्ही हा फोन कारमध्येही फक्त गाण्यांसाठी वापरू शकता.