मोबाईल नेटवर्क विक झाले आहे का? मग अँड्रॉइड आणि आयफोनसाठी या 5 सोप्या ट्रिक वापरा
मोबाईल नेटवर्क अचानक गायब होणं ही त्रासदायक बाब असली, तरी घाबरून जाण्याचं काही कारण नाही. काही सोप्या ट्रिक्स वापरून तुम्ही नेटवर्क पुन्हा मिळवू शकता.
आजच्या युगात मोबाईल नेटवर्क ही आपल्या दैनंदिन जीवनातील अत्यावश्यक गरज बनली आहे. कॉल करणं, इंटरनेट वापरणं, पेमेंट ट्रान्झॅक्शन, अगदी ऑफिसचं कामदेखील नेटवर्कवर अवलंबून आहे. अशा वेळी अचानक मोबाईल नेटवर्क गायब होणं म्हणजे मोठी अडचण. अनेक वेळा आपण पाहतो की सिग्नल पूर्णपणे नाहीसे झालेत, किंवा ‘No Service’, ‘Emergency Calls Only’ असे मेसेज स्क्रीनवर दिसतात. अशा परिस्थितीत आपण फोन रीस्टार्ट करतो किंवा दुसऱ्या ठिकाणी जाऊन उभे राहतो. पण खरंतर, काही सोप्या ट्रिक्स वापरून तुम्ही घरबसल्या अँड्रॉइड आणि आयफोन दोन्ही डिव्हाइसेसवर नेटवर्कच्या समस्येवर मात करू शकता.
1. एअरप्लेन मोड ऑन आणि ऑफ करा
सर्वात सोपी आणि प्रभावी ट्रिक म्हणजे ‘एअरप्लेन मोड’ वापरणं. तुमच्या मोबाईलमध्ये एअरप्लेन मोड काही सेकंदांसाठी ऑन करा आणि मग पुन्हा बंद करा. यामुळे मोबाईल नेटवर्क सिस्टीम रिसेट होते आणि जवळच्या टॉवरशी पुन्हा कनेक्ट होण्याची शक्यता वाढते.
2. सिम कार्ड काढा आणि पुन्हा लावा
कधीकधी सिमकार्ड योग्य रीतीने बसलेलं नसतं किंवा त्याचा संपर्क मोबाईल सर्किटशी तुटतो. अशा वेळी मोबाईल बंद करून सिम कार्ड बाहेर काढा, थोडा वेळ थांबा आणि पुन्हा नीट बसवा. नंतर मोबाईल सुरू केल्यावर नेटवर्क परत येण्याची शक्यता असते.
3. नेटवर्क सेटिंग्स रिसेट करा
जर वरील उपायांनी उपयोग झाला नाही, तर एक थोडासा पायरीने पुढे जाणारा उपाय म्हणजे नेटवर्क सेटिंग्स रिसेट करणं. अँड्रॉइडमध्ये ‘Settings > System > Reset options > Reset Wi-Fi, mobile & Bluetooth’ या पर्यायामार्गे रिसेट करा. आयफोनमध्ये ‘Settings > General > Transfer or Reset iPhone > Reset > Reset Network Settings’ या मार्गाने रिसेट करता येतं. यातून केवळ नेटवर्क सेटिंग्स पुन्हा साचवले जातात, तुमचा डेटा डिलिट होत नाही.
4. सॉफ्टवेअर अपडेट तपासा
कधी-कधी नेटवर्क समस्या ही मोबाईलच्या जुन्या सॉफ्टवेअरमुळेही उद्भवते. त्यामुळे तुमच्या डिव्हाइसला नवीन अपडेट उपलब्ध आहे का, हे ‘Settings > Software Update’ मध्ये जाऊन तपासा. अपडेट केल्यानंतर नेटवर्क सुधारण्याची शक्यता असते.
5. मोबाईल ऑपरेटरशी संपर्क करा
वरील सगळे उपाय करूनही जर नेटवर्क येत नसेल, तर तुमच्या सिम प्रोव्हायडरशी संपर्क साधा. कधीकधी त्यांच्या सिस्टीममध्ये तांत्रिक अडचण असते किंवा तुमच्या सिमशी संबंधित काही अडचण असू शकते. नेटवर्क कस्टमर केअरशी संपर्क करून त्यांना तुमचं स्थान आणि त्रास सांगावा.
