शेतकरी संतप्त, अधिकारी गैरहजर; बाळासाहेब थोरातांनी आंदोलनात उतरून सरकारला सुनावलं

अहिल्यानगर (पूर्वीचे अहमदनगर) येथील प्रांत कार्यालयासमोर काँग्रेस नेते बाळासाहेब थोरात आणि जयश्री थोरात यांच्या नेतृत्वाखाली शेतकऱ्यांनी ठिय्या आंदोलन सुरू केले आहे. प्रांताधिकाऱ्यांनी निवेदन स्वीकारण्यास नकार दिल्याने मोर्चेकरी संतप्त झाले आहेत. चार दिवसांपूर्वी निवेदन देऊनही अधिकारी उपस्थित नसल्याने शेतकरी आपला रोष व्यक्त करत आहेत. बाळासाहेब थोरात यांनी या आंदोलनात सहभागी होत, शेतकऱ्यांचे आणि शेतमजुरांचे प्रश्न अत्यंत महत्त्वाचे असल्याचे म्हटले. सरकारचा एक घटक म्हणून प्रांताधिकाऱ्यांनी निवेदन स्वीकारणे आवश्यक असताना, त्यांना जनतेला सामोरे जाण्याचे मनोधैर्य नसल्याची टीका थोरात यांनी केली.

जनतेच्या प्रश्नांमध्ये सरकारला रस नसल्याचे ते म्हणाले. शेतकऱ्यांना आणि शेतमजुरांना तातडीने मदत मिळावी, तसेच शेतमजुरांना रोजगार उपलब्ध करून द्यावा, अशी मागणी थोरात यांनी यावेळी केली. या ठिय्या आंदोलनामुळे प्रशासकीय उदासीनतेचा मुद्दा पुन्हा ऐरणीवर आला आहे.