Sanjay Raut | शरद पवारांच्या अस्तित्वाशिवाय बारामती आहे का?; पवारांच्या पोस्टरवरून संजय राऊतांचे विधान चर्चेत

उपमुख्यमंत्री सुनेत्रा पवार यांच्या प्रचारासाठी तयार करण्यात आलेल्या एका सोशल मीडिया पोस्टरवरून राजकीय वर्तुळात चर्चा रंगली आहे. या पोस्टरमध्ये सुरुवातीला राष्ट्रवादी काँग्रेसच्या शरद पवार गटाचे प्रमुख शरद पवार यांचा फोटो दिसत होता. मात्र काही वेळातच तो फोटो हटवण्यात आल्याचे समोर आले आहे.
या प्रकरणावर शिवसेना ठाकरे गटाचे खासदार संजय राऊत यांनी माध्यमांशी बोलताना तीव्र प्रतिक्रिया दिली आहे. राऊत म्हणाले, “शरद पवार यांच्या अस्तित्वाशिवाय बारामती आहे का? तुम्ही कितीही मोठे झाले असाल —अजित पवार असतील, सुनेत्रा पवार असतील किंवा त्यांचे चिरंजीव असतील — पण तुम्ही आज राजकारणात ‘पवार’ म्हणून उभे आहात, ते शरद पवारांमुळे आहात. याचा विसर पडता कामा नये.” पुढे बोलताना राऊत यांनी ठाकरे घराण्याचाही उल्लेख केला. “आम्ही सगळे ‘ठाकरे’ या नावामुळे आहोत आणि त्या नावाला वैभव आणि गौरव बाळासाहेब ठाकरे यांनी मिळवून दिला. ते नसते तर आम्ही काय?” असे ते म्हणाले.
तसेच, “आडनावाला महत्त्व नसते, तर त्या नावाला पूर्वसुरींनी दिलेल्या योगदानाला महत्त्व असते. बारामती म्हणजे शरद पवार हे लक्षात ठेवा. आज नरेंद्र मोदी आणि अमित शाह यांनी कोणालाही पुढे केले असेल, पण शरद पवार नसते किंवा त्यांनी बारामती उभी केली नसती, तर पुढील पिढीतील कोणत्याही पवारांना महाराष्ट्रात स्थान मिळाले नसते,” असेही संजय राऊत यांनी स्पष्ट केले. या वक्तव्यामुळे बारामतीच्या राजकारणात पुन्हा एकदा चर्चा रंगण्याची शक्यता व्यक्त केली जात आहे.