Eknath Shinde On Purnekar Case : मीनाक्षी शिंदेंच्या राजीनाम्याबाबत एकनाथ शिंदेंचं एका वाक्यातच उत्तर, म्हणाले…

उपमुख्यमंत्री एकनाथ शिंदे यांनी ठाण्यातील कायदा-सुव्यवस्थेच्या स्थितीवर तीव्र प्रतिक्रिया दिली आहे. बाहेरचे लोक ठाण्यात येऊन त्रास देत आहेत, असा आरोप करत त्यांनी अशांतता निर्माण करणाऱ्यांवर आणि राजकीय पोळी भाजणाऱ्यांवर जोरदार टीका केली. पूर्णेकर कुटुंबीयांवर झालेल्या दुर्दैवी घटनेचे राजकारण करणे त्याहून दुर्दैवी असल्याचे त्यांनी म्हटले. शिंदे यांनी सावकारांना आणि मायक्रो फायनान्स कंपन्यांनाही सक्तीच्या कर्जवसुलीबाबत कडक शब्दांत इशारा दिला. जर कोणी शेतकऱ्याला त्रास दिला, तर त्यांच्यावर कठोर कारवाई केली जाईल आणि प्रकरणात गुन्हा दाखल केला जाईल, असे त्यांनी स्पष्ट केले.

मीनाक्षी शिंदे यांच्या महिला आघाडीच्या जिल्हा संघटक पदाच्या राजीनाम्यावर बोलताना, उपमुख्यमंत्री म्हणाले की, त्यांच्या नावाचा घटनेशी वारंवार संबंध जोडला जात असल्याने पक्षाला त्रास होत होता, म्हणून त्यांनी भावना व्यक्त करत राजीनामा दिला. पोलीस तपास निष्पक्षपणे सुरू असून, आरोपींना अटक करण्यात आली आहे. जनतेने पोलिसांवर दबाव आणू नये किंवा त्यांना वेठीस धरू नये, असे आवाहनही त्यांनी केले. कायदा-सुव्यवस्था राखण्याची जबाबदारी शिवसेनेची असून, नागरिकांना कोणताही त्रास होणार नाही याची काळजी घेतली जाईल, असे शिंदे यांनी नमूद केले.