Video : गणपती विसर्जन मिरवणूक… मुंबईच्या परळचा राजा तेजुकायाची भव्य मिरवणूक

मुंबईतील परळचा राजा तेजुकायाची विसर्जन मिरवणूक मोठ्या उत्साहात सुरू झाली आहे. दख्खनचा राजा श्री ज्योतिबा या संकल्पनेवर आधारित यंदाचा देखावा भाविकांचे मुख्य आकर्षण ठरला आहे. श्री ज्योतिबांच्या भक्ती परंपरेचे आणि धार्मिक वैभवाचे दर्शन घडवण्याचा प्रयत्न यातून करण्यात आला आहे. तेजुकाया गणपतीच्या मूर्तीचे मोठे कान हे त्याच्या रूपाचे एक वैशिष्ट्य मानले जाते. गुलालाची उधळण, ढोल-ताशांचा गजर आणि गणपती बाप्पा मोरया, पुढच्या वर्षी लवकर या च्या जयघोषात हजारो भाविक बाप्पाला निरोप देण्यासाठी एकत्र जमले आहेत.

रस्त्यावर मोठ्या प्रमाणात गर्दी असली तरी पोलीस प्रशासनाकडून योग्य ती खबरदारी घेतली जात आहे. तरुणाई ढोल-ताशांच्या तालावर थिरकताना, तर लेझीमचा सूर ऐकू येत आहे, ज्यामुळे भक्ती आणि जल्लोषाचा सुंदर संगम पाहायला मिळत आहे. विसर्जन मिरवणुकीसाठी वाहतुकीतही बदल करण्यात आले आहेत. हा निरोप आनंदाचा, श्रद्धेचा आणि पुढच्या वर्षी लवकर येण्याच्या आशेचा आहे. पालिका आणि पोलीस प्रशासन विसर्जनासाठी सज्ज असून, हा सोहळा शांततेत पार पडत आहे.