संसद ते निवडणूक आयोग! ज्ञानेश कुमार यांच्या विरोधात इंडिया आघाडीचा महामोर्चा, जय्यत तयारी

आज सकाळी साडेदहा वाजता इंडिया आघाडीचे खासदार मुख्य निवडणूक आयुक्त ज्ञानेश कुमार यांच्या विरोधात मोर्चा काढणार आहेत. हा मोर्चा संसद भवनातील मकर द्वारापासून सुरू होऊन केंद्रीय निवडणूक आयोगाच्या कार्यालयापर्यंत नेण्यात येणार आहे. या आंदोलनात इंडिया आघाडीतील सर्व खासदार सहभागी होणार असून, ज्ञानेश कुमार यांच्या नियुक्ती आणि कार्यपद्धतीबाबत विरोधकांनी प्रश्नचिन्ह उपस्थित केले आहे. गेल्या काही दिवसांपासून ज्ञानेश कुमार यांच्या निवडीवरून राजकीय वर्तुळात चर्चा सुरू होती.

आता थेट संसद ते निवडणूक आयोग असा मोर्चा काढून इंडिया आघाडीने या मुद्द्याला आणखी धार दिली आहे. विरोधी पक्षांकडून लोकशाही मूल्ये आणि निवडणूक प्रक्रियेतील पारदर्शकतेवर भर दिला जात आहे. या मोर्चातून इंडिया आघाडी आपली एकता आणि निवडणूक आयोगाच्या कामकाजावरील आपली भूमिका स्पष्ट करण्याचा प्रयत्न करणार आहे. महाराष्ट्राच्या राजकारणातही या घडामोडींचे पडसाद उमटण्याची शक्यता आहे, कारण अनेक महत्त्वाचे नेते आणि पक्ष इंडिया आघाडीचा भाग आहेत. या आंदोलनामुळे आगामी काळात देशाच्या राजकारणात नवी समीकरणे तयार होऊ शकतात.