इराण आणि इस्रायल युद्धावरून संसद तापली, लोकसभेत गदारोळ

इराण आणि इस्रायल यांच्यातील युद्धामुळे आंतरराष्ट्रीय स्तरावर निर्माण झालेल्या तणावाचा भारतावर होत असलेल्या परिणामांवरून लोकसभेत जोरदार गदारोळ झाला. विरोधकांनी या गंभीर विषयावर तातडीने चर्चा करण्याची मागणी केली, विशेषतः इंधन दरवाढीसारख्या थेट परिणामांवरून चिंता व्यक्त केली. मात्र, सरकारने विरोधकांची ही मागणी फेटाळून लावली.

या गदारोळात परराष्ट्र मंत्री एस. जयशंकर यांनी भारताची भूमिका स्पष्ट केली. भारतीय ग्राहकांचे हित सर्वोच्च ठेवून ऊर्जा बाजारातील उपलब्धता, खर्च आणि जोखीम विचारात घेतली जाईल, असे त्यांनी सांगितले. भारत शांतता आणि चर्चेच्या माध्यमातून मार्ग काढण्याच्या बाजूने असल्याचेही त्यांनी नमूद केले. या निवेदनानंतरही विरोधक चर्चेवर ठाम राहिले आणि त्यांनी घोषणाबाजी करत सभागृह दणाणून सोडले. सत्ताधारी आणि विरोधकांमध्ये जोरदार शाब्दिक चकमक झाली. अखेरीस, सभागृहातील गोंधळामुळे लोकसभेचे कामकाज दिवसभरासाठी तहकूब करण्यात आले.