रस्त्यावर माणसं चालतात की जनावरं? नांदेडच्या रस्त्यांवर कैलास खेर यांची तीव्र नाराजी

नांदेड जिल्ह्यातील खराब रस्त्यांमुळे सुप्रसिद्ध गायक कैलास खेर यांना तीव्र मनस्ताप झाला. नांदेडमध्ये आयोजित कुसुंब महोत्सवासाठी आलेल्या कैलास खेर यांनी रस्त्यांच्या दुरवस्थेबद्दल आपली नाराजी थेट खासदार अशोक चव्हाण यांच्यासमोर व्यक्त केली.

प्रवासादरम्यान रस्त्यावरच्या खड्ड्यांमुळे झालेल्या त्रासाविषयी बोलताना खेर यांनी कठोर शब्दांत प्रशासनावर टीका केली. “रस्त्यावर माणसं चालतात की जनावरं?” असा सवाल करत त्यांनी रस्त्यांची भयानक परिस्थिती अधोरेखित केली. तसेच, वाहनात बसून येताना अक्षरशः खुंटीला टांगल्यासारखं वाटल्याचेही त्यांनी म्हटले. कैलास खेर यांच्या या वक्तव्यामुळे नांदेडमधील रस्त्यांच्या दुर्दशेचा प्रश्न पुन्हा एकदा ऐरणीवर आला आहे. एका सार्वजनिक कार्यक्रमासाठी आलेल्या कलाकारालाही अशा बिकट परिस्थितीतून जावे लागल्याने स्थानिक नागरिकांकडूनही तीव्र प्रतिक्रिया उमटत आहेत. या घटनेमुळे नांदेडच्या पायाभूत सुविधांवर नव्याने लक्ष केंद्रित होण्याची शक्यता आहे.