Video : दगडूशेठ गणपती विसर्जन, पारंपरिक चेंडा वादनाने उत्सव खास

पुण्यातील प्रसिद्ध श्रीमंत दगडूशेठ हलवाई गणपती बाप्पाच्या विसर्जन मिरवणुकीत यंदाही केरळच्या पारंपरिक चेंडा वादनाने विशेष रंगत आणली. मंदिरासमोर आणि मुख्य मिरवणुकीपूर्वी हे चेंडा वादन सादर करण्यात आले. केरळमधून आलेल्या वादकांनी, जे आता पुण्यात स्थायिक झाले आहेत, त्यांनी गेल्या आठ वर्षांपासून ही सेवा अखंडपणे दिली आहे. हे चेंडा वाद्य केरळची एक अत्यंत जुनी आणि महत्त्वपूर्ण परंपरा आहे. केरळमधील मंदिरांमध्ये पूजा, आरती आणि अन्य धार्मिक विधींच्या वेळी हे वाद्य मोठ्या उत्साहात वाजवले जाते.

आता पुण्यातही दगडूशेठ गणपती बाप्पाच्या आशीर्वादाने त्यांना ही सेवा करण्याची संधी मिळत असल्याचे वादकांनी सांगितले. या वादनामुळे दगडूशेठ गणपती परिसरातील वातावरण अधिकच भक्तीमय झाले होते. विसर्जन मिरवणुकीला निरोप देताना हे पारंपरिक वादन भाविकांचे लक्ष वेधून घेत होते, ज्यामुळे पुणे आणि केरळच्या सांस्कृतिक परंपरेचा सुंदर संगम अनुभवायला मिळाला.