Eknath Khadse : ड्रोन रेकीवरून खडसे-महाजन आमनेसामने; जिल्ह्याचे नॉन-सिरीयस मंत्री म्हणत, एकनाथ खडसेंचा पलटवार

माजी मंत्री एकनाथ खडसे यांनी त्यांच्या फार्महाऊसजवळ 28 सप्टेंबर रोजी ड्रोनद्वारे रेकी करण्यात आल्याचा दावा केला आहे. या प्रकरणावर स्थानिक आमदार आणि मंत्री, विशेषतः गिरीश महाजन यांनी “टिंगल” उडवली, असा आरोप खडसेंनी केला. गिरीश महाजन यांनी गंभीरपणे लक्ष देणे अपेक्षित असताना त्यांनी उलट टिंगल केली, असे खडसे म्हणाले.

खडसेंच्या म्हणण्यानुसार, हा ड्रोन नंतरच्या काळात घोळसगावकडून निमखेडीमार्गे त्यांच्या फार्महाऊसवर सातत्याने दिसला. एवढेच नाही तर हातनूर धरणावरही दोन-तीन दिवस तो रेकी करत होता. या संदर्भात हातनूर धरणाचे डेप्युटी इंजिनियर चौधरी यांनी सावदा आणि वरणगाव पोलीस ठाण्यात माहिती दिली होती. धक्कादायक बाब म्हणजे, हा ड्रोन हातनूर धरणावरून वरणगाव येथील डिफेन्स फॅक्टरीकडेही गेला होता.

या महत्त्वाच्या जागांची रेकी करणे हा एक गंभीर प्रयत्न असून, यामागे काही कट असू शकतो, अशी भीती खडसेंनी व्यक्त केली. त्यांनी पोलिसांकडून या प्रकरणाची अधिक सखोल चौकशी करून सत्य समोर आणण्याची मागणी केली आहे.