56 फुटले, ठाकरेंनी 66 निवडून आणले! मुंबई महापालिकेत कोण सरस?

मुंबई महानगरपालिकेत प्रथमच भाजपचा महापौर विराजमान होणार असून, ठाकरेंची अडीच दशकांची सत्ता संपुष्टात आली आहे. हा भाजपसाठी ऐतिहासिक विजय मानला जात आहे. मात्र, पक्ष आणि अनेक नगरसेवकांनी साथ सोडल्यानंतरही उद्धव ठाकरे यांनी दिलेली झुंज मुंबईत चर्चेचा विषय ठरली आहे.

एकनाथ शिंदे यांच्या बंडानंतर शिवसेनेत फूट पडली. त्यानंतर ठाकरेंकडे अवघे ३८ माजी नगरसेवक उरले होते. तरीही त्यांनी निवडणुकीत ६६ नगरसेवक निवडून आणले. याउलट, शिंदे यांनी घेतलेल्या ५७ नगरसेवकांपैकी केवळ २९ नगरसेवक जिंकून आले. यामुळे, पक्षफुटीनंतरही ठाकरे गटाने आपली ताकद दाखवून दिली आहे. जरी मुंबई महापालिकेवरील सत्ता गमावली असली तरी, मुंबईतील शिवसेना ही अजूनही ठाकरेंचीच ही ओळख कायम असल्याचे या निकालातून अधोरेखित झाले आहे.