विधान परिषदेच्या जागेवरून मविआत तोडगा नाही, पुन्हा बैठक होणार
विधान परिषदेच्या जागावाटपावरून महाविकास आघाडीच्या बैठकीत तोडगा निघालेला नाही. उद्या पुन्हा बैठक घेऊन अंतिम निर्णय होण्याची शक्यता आहे. काँग्रेसने परस्पर उमेदवार दिल्याने मविआत नाराजी आहे. अमरावती, पुणे आणि मराठवाडा पदवीधर मतदारसंघावरूनही तिढा कायम असून, शिवसेना (उद्धव बाळासाहेब ठाकरे गट) दोन जागांवर दावा करत आहे.
विधान परिषदेच्या आगामी निवडणुकीसाठी महाविकास आघाडीतील जागावाटपावरून अद्याप तोडगा निघालेला नाही. या संदर्भात झालेल्या बैठकीत कोणताही अंतिम निर्णय झाला नसून, उद्या (शनिवारी) संध्याकाळी पुन्हा बैठक घेऊन मार्ग काढण्याची शक्यता आहे. काँग्रेस पक्षाने परस्पर उमेदवार जाहीर केल्यामुळे महाविकास आघाडीत नाराजीचे सूर उमटले आहेत. अमरावती आणि पुण्यासह मराठवाडा पदवीधर मतदारसंघाच्या जागेवरूनही आघाडीमध्ये तिढा कायम आहे. मराठवाडा पदवीधर जागेसाठी राष्ट्रवादी काँग्रेस (शरदचंद्र पवार गट) आणि शिवसेना (उद्धव बाळासाहेब ठाकरे गट) या दोन्ही पक्षांनी दावा केला आहे.
शिक्षक मतदारसंघ आणि मराठवाडा पदवीधर मतदारसंघ या दोन जागा शिवसेना (उद्धव बाळासाहेब ठाकरे गट) लढवणार असल्याची घोषणा संजय राऊत यांनी केली आहे, तर उमेदवारांची घोषणा लवकरच अपेक्षित आहे. काँग्रेसने अमरावती, नागपूर आणि पुणे विभाग शिक्षक मतदारसंघासाठी उमेदवार जाहीर केले आहेत. जर एकमत होत नसेल, तर मैत्रीपूर्ण लढतीसाठी आम्ही तयार आहोत, असे संजय राऊत यांनी नमूद केले आहे. एकत्रितपणे उमेदवारी घोषित करण्याऐवजी काँग्रेसने केंद्रीय प्रभारींसोबतच्या बैठकीनंतर उमेदवार जाहीर केल्याने हा वाद निर्माण झाल्याचे समोर आले आहे.
