पवार राज्यसभेवर गेल्यास ठाकरेंचा फायदा, काँग्रेसचं नुकसान?
महाराष्ट्रातील महाविकास आघाडीत राज्यसभा आणि विधान परिषदेच्या जागांवरून रस्सीखेच सुरू आहे. शरद पवार राज्यसभेवर गेल्यास, उद्धव ठाकरेंना विधान परिषदेची जागा मिळण्याची शक्यता आहे, ज्यामुळे काँग्रेसला दोन्ही ठिकाणी संधी गमवावी लागू शकते. काँग्रेसने राज्यसभेसाठी दावा केला असून, घटक पक्षांमध्ये चर्चा सुरू आहे.
महाराष्ट्रातील महाविकास आघाडीमध्ये राज्यसभा आणि विधान परिषदेच्या जागावाटपावरून तीव्र मतभेद आणि रस्सीखेच सुरू झाली आहे. ठाकरेंच्या शिवसेनेनंतर आता काँग्रेसनेही राज्यसभेच्या जागेवर दावा केला आहे. प्रदेशाध्यक्ष हर्षवर्ध सपकाळ यांनी काँग्रेससाठी राज्यसभेची जागा सोडावी आणि उद्धव ठाकरे यांनी विधान परिषदेत जावे अशी मागणी केली आहे.
राज्यसभेसाठी ५ मार्च ही उमेदवारी अर्ज दाखल करण्याची अंतिम तारीख असून, महाराष्ट्रातून सात खासदार निवृत्त होत आहेत. यात शरद पवार, फौजिया खान, प्रियंका चतुर्वेदी आणि रजनी पाटील यांचा समावेश आहे. महाविकास आघाडीच्या संख्याबळानुसार विरोधकांना केवळ एकच राज्यसभा जागा जिंकता येणार असल्याने, ही जागा कोणाला मिळणार हा प्रश्न आहे. शरद पवारांनी पुन्हा राज्यसभेवर जाण्याचा निर्णय घेतल्यास, ठाकरेंची शिवसेना आणि काँग्रेस दोघांनाही आपल्या दाव्यावरून माघार घ्यावी लागू शकते. अशा स्थितीत काँग्रेसला राज्यसभा आणि विधान परिषद या दोन्ही ठिकाणी संधी मिळणार नाही.
