Nagpur Orange Loss | संत्र्याचा सडाच पडला! नागपूरच्या बागांमध्ये मोठ्या प्रमाणात फळगळ; 20-25 दिवसांपासून पाऊस गायब, शेतकरी संकटात
विदर्भात दुष्काळसदृश परिस्थितीमुळे प्रसिद्ध नागपुरी संत्र्याच्या पिकाला मोठा फटका बसला आहे. अपुऱ्या पाऊस आणि वाढलेल्या तापमानामुळे संत्र्याची मोठ्या प्रमाणात फळगळ होत आहे. यामुळे संत्र्याचे उत्पादन घटण्याची भीती असून, मृग बहाराचेही नुकसान झाले आहे. शेतकऱ्यांचे मोठे आर्थिक नुकसान होणार आहे.
विदर्भ आणि नागपूरच्या काही भागांमध्ये सध्या दुष्काळसदृश परिस्थिती निर्माण झाली आहे. सरासरीपेक्षाही कमी पाऊस झाल्याने, विशेषतः काही ठिकाणी सरासरीच्या ५० टक्क्यांपर्यंत कमी पाऊस झाल्याने, याचा परिणाम आता प्रसिद्ध नागपुरी संत्र्याच्या पिकावर दिसू लागला आहे.
गेल्या २० ते २५ दिवसांपासून पावसाने ओढ दिल्याने आणि वाढलेल्या तापमानामुळे संत्र्याच्या बागांमध्ये मोठ्या प्रमाणात फळगळ होत आहे. संत्र्याची फळे गळून जमिनीवर पडलेली दिसत आहेत, जणू काही संत्र्याचा सडाच पडला आहे. यामुळे संत्रा उत्पादकांना, विशेषतः मृग बहाराच्या उत्पादनात मोठी घट येण्याची भीती आहे.
दुष्काळी परिस्थितीचा फटका यापूर्वी सोयाबीन, उडीद आणि मूग या पिकांना बसला होता आणि आता त्याचे परिणाम नागपुरी संत्र्यावरही दिसून येत आहेत. ही परिस्थिती शेतकऱ्यांसाठी अत्यंत चिंताजनक आहे, कारण त्यांचे वर्षभराचे उत्पन्न धोक्यात आले आहे.
