Rahul Gandhi : मविआ गेली खड्ड्यात.. ठाकरे गटाचा थेट इशारा; आघाडीत मिठाचा खडा पडला?
Shivsena UBT On Rahul Gandhi Statement : शिवसेना उद्धव ठाकरे गटाकडून राहुल गांधी यांना थेट इशारा देण्यात आलेला असून महाविकास आघाडी खड्ड्यात गेली असं उबाठाच्या पदाधिकाऱ्यांनी म्हंटलं आहे.
राहुल गांधी नाशिकमध्ये आल्यास तोंडाला काळं फासू, असा इशारा उद्धव ठाकरेंच्या शिवसेनेचे नाशिक उपमहानगर प्रमुख बाळा दराडे यांनी दिला आहे. सावरकर यांच्याबद्दल केलेलं वक्तव्य खपवून घेणार नाही, असंही दराडे यांनी म्हंटलं आहे. मविआ गेली खड्ड्यात, आधी सावरकर आणि हिंदुत्व असं मोठं वक्तव्य दराडे यांनी केलं आहे.
यावेळी बोलताना दराडे म्हणाले की, स्वातंत्र्यवीर सावरकरांच्या जन्मभूमीमध्ये आम्ही राहतो, त्याचा आम्हाला अभिमान आहे. राहुल गांधी यांनी सावरकरांबाबत अपशब्द वापरले, त्याबाबत आम्ही त्यांचा निषेध व्यक्त करतो. आमचे पक्षप्रमुख उद्धव ठाकरे आणि ठाकरे गटाचे नेते संजय राऊत यांनी त्यांच्या शैलीत राहुल गांधी यांना सुनावले आहे. सावरकरांबाबत अपशब्द वापरल्यास आम्ही त्यांना धडा शिकवू. जरी आम्ही महाविकास आघाडीमध्ये असलो तरी, महाविकास आघाडी खड्ड्यात गेली, असा थेट इशारा दराडे यांनी दिला आहे. दरम्यान, त्यांच्या या आक्रमक पवित्र्यामुळे महाविकास आघाडीत मिठाचा खडा पडण्याची शक्यता आहे.
