Navnath Ban Vs Rohit Pawar : रोहित पवार तुम्ही लपवालपवी का करतायत? नवनाथ बन यांचा सवाल; नेमकं काय म्हणाले?
अजित पवारांच्या विमान अपघातानंतर VSR कंपनीवर आरोप करणाऱ्या रोहित पवारांना नवनाथ बन यांनी घेरले आहे. बन यांच्या दाव्यानुसार, रोहित पवारांनी दीड महिन्यांपूर्वी अजितदादांसोबत अपघातग्रस्त VSR विमानानेच प्रवास केला होता, ज्याचे पायलटही तेच होते. बन यांनी रोहित पवारांना त्यांची माहिती खोटी असल्याचे सिद्ध करण्याचे आव्हान दिले आहे.
अजित पवारांच्या विमान अपघातानंतर VSR विमान कंपनीवर गंभीर आरोप करणारे रोहित पवार आता नवनाथ बन यांच्या निशाण्यावर आले आहेत. बन यांनी रोहित पवारांवर “लपवालपवी” करत असल्याचा आणि “खोटाडेपणा” करत असल्याचा आरोप केला आहे. बन यांच्या दाव्यानुसार, अजितदादांचा अपघात होण्यापूर्वी दीड महिन्यांपूर्वी, म्हणजे 10-12-2025 रोजी, रोहित पवार यांनी अजित पवार यांच्यासोबत त्याच अपघातग्रस्त VSR विमानाने दिल्ली ते नागपूर असा प्रवास केला होता. धक्कादायक बाब म्हणजे, त्या विमानाचे पायलट सुमित कुमार आणि कॅप्टन शांभवी हेच होते, जे अपघातावेळीही उपस्थित होते असे बन यांचे म्हणणे आहे.
नवनाथ बन यांनी थेट रोहित पवारांना माध्यमांसमोर येऊन ही माहिती खोटी असल्याचे जाहीर करण्याचे आव्हान दिले आहे. “तुम्ही कधी VSR च्या विमानाने प्रवास केलाच नव्हता असे खोटे रोहित पवार का म्हणाले? ते लपवू पाहतायेत का?” असे सवाल बन यांनी उपस्थित केले आहेत. बन यांनी रोहित पवारांची चौकशी करण्याची मागणीही केली आहे. या नव्या आरोपामुळे अजित पवारांच्या विमान अपघातावरून सुरू असलेल्या राजकीय वादाला नवी दिशा मिळाली आहे.
