NCP Merger : दोन्ही राष्ट्रवादी एकत्र येणार? शरद पवार-प्रफुल्ल पटेल भेटीनंतर राजकीय वर्तुळात चर्चांना उधाण

महाराष्ट्राच्या राजकारणात सध्या अनेक महत्त्वपूर्ण घडामोडी घडत आहेत. राष्ट्रवादी काँग्रेसच्या दोन्ही गटांमध्ये सुरू असलेल्या हालचालींनंतर, ज्येष्ठ नेते शरद पवार आणि प्रफुल्ल पटेल यांच्यातील ब्रीच कँडी येथील भेटीने राजकीय वर्तुळात पुन्हा एकदा राष्ट्रवादीच्या संभाव्य विलिनीकरणाची चर्चा सुरू झाली आहे. या भेटीदरम्यान, १० तारखेनंतर पुन्हा भेटून सविस्तर चर्चा करण्याचे दोघांमध्ये एकमत झाले आहे. प्रफुल्ल पटेल यांच्या आधी छगन भुजबळ यांनीही शरद पवारांची भेट घेतली होती.

सोमवारपासून दोन्ही राष्ट्रवादींमध्ये तीन महत्त्वाच्या घटना घडल्या आहेत. अजित पवारांच्या गटात नेतृत्वाच्या समन्वयावर एकमत होऊन पक्षाचे निर्णय सर्वानुमते घेण्याचे ठरले. दुसरीकडे, पुण्यातील रुबी हॉल क्लिनिकमध्ये उपचार घेत असताना पंतप्रधान नरेंद्र मोदी यांनी शरद पवारांना फोन करून त्यांच्या प्रकृतीची चौकशी केली आणि त्यांना विश्रांतीचा सल्ला दिला. “सुप्रिया आणि आम्ही देश सांभाळतो, तुम्ही आम्हाला आशीर्वाद देण्यासाठी ठणठणीत राहा,” असे मोदींनी म्हटल्याचे वृत्त आहे. या सर्व घडामोडींनंतर १० तारखेनंतर होणारी पुढील भेट आणि चर्चेचे तपशील महत्त्वाचे ठरणार आहेत.