Pune Ganpati Visarjan : धान्य, फळं अन् उसाची शेती… देखाव्यातून शेतकऱ्यांची व्यथा! केसरीवाडा गणपतीने वेधलं पुणेकरांचं लक्ष

पुण्यातील मानाच्या पाचही गणपतींच्या विसर्जन मिरवणुकीला मंडई चौकातून सुरुवात झाली आहे. लक्ष्मी रस्त्यावरुन घाटमार्गे विसर्जनासाठी निघालेल्या या मिरवणुकांत यंदा मानाचा पाचवा केसरीवाडा गणपती विशेष लक्ष वेधून घेत आहे. केसरीवाडा गणेशोत्सवाने यंदा सामाजिक संदेश देणारा देखावा साकारला आहे. महाराष्ट्रातील शेतकऱ्यांवर आलेल्या दुष्काळाचे सावट आणि त्यांचे कष्ट या देखाव्यामधून प्रभावीपणे मांडण्यात आले आहेत. शेतीतील धान्य, फळे आणि उसाची शेती याचे प्रतिकृतीकरण करून, शेतकऱ्यांवरील संकट दूर होण्यासाठी गणपती बाप्पाला साकडे घालण्यात आले आहे.

अभेद्य ढोलताशा पथकाच्या दणदणाटात ही मिरवणूक सुरू झाली असून, ढोलताशांच्या गजरात गणेश भक्तांचे लक्ष वेधले जात आहे. लोकमान्य टिळकांनी सुरू केलेला हा ऐतिहासिक केसरीवाडा गणपती, परंपरेचा मान राखत, पुणेरी संस्कृती जपत आणि सामाजिक भान ठेवत यंदाच्या विसर्जन मिरवणुकीत सहभागी झाला आहे. हा देखावा केवळ डोळ्यांचे पारणे फेडणारा नसून, तो शेतकऱ्यांच्या वेदनेला वाचा फोडून एक महत्त्वाचा सामाजिक संदेश देत आहे.