रायगडमध्ये खळबळ! नदीचं पाणी ओसरलं अन् मगर थेट रस्त्यावर आली; व्हिडीओ होतोय व्हायरल

रायगड जिल्ह्यातील महाड तालुक्यात मुसळधार पावसानंतर एक धक्कादायक घटना समोर आली आहे. बिरवाडी शहरातील कुंभारवाडा परिसरात एक मोठी मगर रस्त्यावर फिरताना आढळल्याने नागरिकांमध्ये भीतीचे वातावरण निर्माण झाले आहे.

मिळालेल्या माहितीनुसार, परिसरातील नदीला आलेल्या पुराचे पाणी ओसरल्यानंतर ही मगर नदीपात्रातून बाहेर येत रस्त्यावर फिरताना दिसली. मगर दिसताच स्थानिक नागरिकांनी सुरक्षित अंतर राखत संबंधित प्रशासन आणि वन विभागाला याची माहिती दिली.

कुंभारवाडा परिसरात मगर आढळल्यामुळे नागरिकांमध्ये घबराट पसरली असून, विशेषतः लहान मुले आणि ज्येष्ठ नागरिकांच्या सुरक्षेबाबत चिंता व्यक्त केली जात आहे. नागरिकांनी वन विभागाने तातडीने घटनास्थळी दाखल होऊन मगरीला सुरक्षितरित्या पकडून तिच्या नैसर्गिक अधिवासात सोडावे, अशी मागणी केली आहे.

दरम्यान, वन विभाग आणि स्थानिक प्रशासन परिस्थितीवर लक्ष ठेवून असून, नागरिकांनी अफवांवर विश्वास न ठेवता मगरीच्या जवळ जाण्याचा किंवा तिला पकडण्याचा प्रयत्न करू नये, असे आवाहन करण्यात आले आहे. तसेच, परिसरात सतर्कता वाढवण्यात आली असून, आवश्यक ती उपाययोजना करण्याची प्रक्रिया सुरू आहे.