इंडिया आघाडीची महारॅली नव्हे, हे तर लोकशाही वाचवण्यासाठीचे बंड; संजय राऊतांचं विधान

शिवसेना (उद्धव बाळासाहेब ठाकरे) नेते संजय राऊत यांनी दिल्लीत झालेल्या इंडिया आघाडीच्या महारॅलीला बंड असे संबोधले आहे. ही केवळ गर्दी नसून, लोकशाही आणि संविधान वाचवण्यासाठी जनता रस्त्यावर उतरल्याचे राऊत यांनी म्हटले. त्यांनी 1974 मधील जयप्रकाश नारायण यांच्या दिल्लीतील रॅलीची आठवण करून दिली. राहुल गांधींनी लोकांना एकत्र आणण्यात यश मिळवले असून, मोदी-शाह सरकारला आता कोणीही वाचवू शकणार नाही, असा दावा राऊत यांनी केला. राऊत यांनी केंद्र सरकारवर अनेक मुद्द्यांवरून टीका केली.

बांगलादेशी घुसखोरांच्या कथित संख्येवरून त्यांनी केंद्रीय गृहमंत्री अमित शाह यांच्यावर थेट हल्ला चढवला. साडेतेरा कोटी बांगलादेशी भारतात कसे आले, हा शाह यांचा पराभव असल्याचे ते म्हणाले. तसेच, काँग्रेसला चीनकडून निधी मिळत असल्याच्या आरोपांना राऊत यांनी फेटाळून लावले. चीन अरुणाचल प्रदेश, लडाख आणि नेपाळमध्ये घुसला असताना सरकार त्यावर का बोलत नाही, असा सवाल त्यांनी उपस्थित केला. लोकशाही धोक्यात असताना, हे जुलमी आणि पापी सरकार हटवण्यासाठी जनता रस्त्यावर उतरली आहे, असेही राऊत यांनी स्पष्ट केले.