मंगेश चिवटेंच्या उमेदवारीवर शहाजी बापू पाटलांचा यू-टर्न, विरोध मागे घेऊन प्रचारात सक्रिय

मंगेश चिवटेंच्या पुणे विभाग शिक्षक मतदारसंघातील उमेदवारीवरून राजकीय वर्तुळात मोठी घडामोड समोर आली आहे. शिवसेनेचे नेते शहाजी बापू पाटील यांनी सुरुवातीला मंगेश चिवटेंच्या उमेदवारीला विरोध दर्शवला होता, मात्र आता त्यांनी आपला पवित्रा बदलत चिवटेंना पूर्ण समर्थन जाहीर केले आहे. यापूर्वी शहाजी बापू पाटलांनी स्पष्ट केले होते की, चिवटेंच्या उमेदवारीला त्यांचे समर्थन नाही. त्यांनी त्यावेळी सांगितले होते की, दोन जागांपैकी एक भाजपला आणि एक शिवसेनेला मिळायला हवी होती. मात्र, कोणत्या कारणाने दोन्ही जागा भाजपला मिळाल्या, हे समजत नसल्याचे त्यांनी म्हटले होते. चिवटेंचा अर्ज भरण्याच्या प्रक्रियेत आपण सहभागी नसल्याचेही त्यांनी या आधी नमूद केले होते.

परंतु, आता शहाजी बापू पाटलांनी आदरणीय मुख्यमंत्री एकनाथ शिंदे साहेबांच्या आदेशाचे पालन करणार असल्याचे म्हटले आहे. त्यानुसार, पुणे विभाग शिक्षक मतदारसंघासाठी शिवसेनेच्या वतीने मंगेश चिवटे यांची उमेदवारी निश्चित झाली असून, उद्या त्यांचा उमेदवारी अर्ज दाखल करण्यासाठी स्वतः शहाजी बापू पाटील पुणे येथील आयुक्त कार्यालयात उपस्थित राहणार आहेत. त्यांनी मंगेश चिवटेंना मनापासून समर्थन देत त्यांचा प्रचार करण्याची ग्वाही दिली आहे. हा यू-टर्न राजकीय वर्तुळात चर्चेचा विषय ठरला आहे.