Shaina NC | शिवसेना नेत्या शायना एनसी यांचं WhatsApp हॅक; अज्ञातांकडून पैशांची मागणी सुरू!

शिवसेना प्रवक्त्या शायना एनसी यांचे व्हॉट्सअॅप अकाउंट हॅक झाल्याची धक्कादायक घटना समोर आली आहे. त्यांच्या नावाने अज्ञात व्यक्तीकडून संपर्क साधत पैशांची मागणी केली जात असल्याची माहिती समोर आली आहे.

मिळालेल्या माहितीनुसार, शायना एनसी यांच्या व्हॉट्सअॅप अकाउंटवर सायबर हल्ला करण्यात आला असून, हॅकरने त्यांच्या संपर्क यादीतील व्यक्तींना संदेश पाठवून आर्थिक मदतीच्या नावाखाली पैशांची मागणी करण्यास सुरुवात केली आहे.

या प्रकाराची माहिती समोर आल्यानंतर शायना एनसी यांनी नागरिक, कार्यकर्ते आणि परिचितांना सतर्क राहण्याचे आवाहन केले आहे. त्यांच्या व्हॉट्सअॅपवरून येणाऱ्या कोणत्याही आर्थिक व्यवहाराच्या मागणीवर विश्वास ठेवू नये आणि पैसे पाठवू नयेत, असे त्यांनी स्पष्ट केले आहे.

दरम्यान, या संपूर्ण प्रकरणाची माहिती संबंधित सायबर यंत्रणांना देण्यात आली असून, व्हॉट्सअॅप अकाउंट हॅक करणाऱ्या अज्ञात व्यक्तीचा शोध घेण्यासाठी तपास सुरू करण्यात आला आहे. नागरिकांनीही अशा सायबर फसवणुकीपासून सावध राहण्याचे आवाहन करण्यात आले आहे.