वारसा विचारांचा, हीरक महोत्सव शिवसेनेचा; वर्धापन दिनी ठाकरे-शिंदे काय बोलणार?

शिवसेनेच्या 60 व्या वर्धापन दिनानिमित्त आज राज्याच्या राजकारणाचे लक्ष मुंबईकडे लागले आहे. शिवसेनेचे दोन्ही गट स्वतंत्रपणे वर्धापन दिन साजरा करणार असून, संध्याकाळी मुख्यमंत्रीपदाचे माजी दावेदार आणि पक्षप्रमुख उद्धव ठाकरे तसेच उपमुख्यमंत्री एकनाथ शिंदे यांचे स्वतंत्र मेळावे होणार आहेत.

मिळालेल्या माहितीनुसार, शिवसेना (एकनाथ शिंदे गट) यांचा वर्धापन दिन सोहळा गोरेगाव येथील नेस्को एक्झिबिशन सेंटरमध्ये आयोजित करण्यात आला आहे. तर शिवसेना (उद्धव बाळासाहेब ठाकरे) गटाचा मेळावा सायन येथील षण्मुखानंद सभागृहात पार पडणार आहे.

यंदाचा वर्धापन दिन विशेष चर्चेत राहिला आहे. अलीकडील राजकीय घडामोडी, खासदारांच्या भूमिकांबाबत सुरू असलेल्या चर्चा आणि तथाकथित “ऑपरेशन टायगर”मुळे या कार्यक्रमांकडे राजकीय वर्तुळाचे विशेष लक्ष लागले आहे.

दरम्यान, षण्मुखानंद सभागृह परिसरात पक्षाकडून मोठ्या प्रमाणावर बॅनरबाजी करण्यात आली आहे. विविध घोषवाक्यांद्वारे कार्यकर्त्यांमध्ये उत्साह निर्माण करण्याचा प्रयत्न केला जात आहे. दुसरीकडे शिंदे गटाकडूनही वर्धापन दिनानिमित्त विशेष प्रचार मोहीम राबवली जात असून, “जनात शिवसेना, मनात शिवसेना” ही टॅगलाईन चर्चेचा विषय ठरली आहे.

या पार्श्वभूमीवर दोन्ही मेळाव्यांमध्ये पक्षप्रमुख आणि नेते कोणती भूमिका मांडणार, तसेच आगामी राजकीय घडामोडींवर काय भाष्य करणार याकडे संपूर्ण राज्याचे लक्ष लागले आहे.