ठाकरे गटाला मोठा धक्का! महिला नेत्याचं जात प्रमाणपत्र अचानक रद्द, पदावर टांगती तलवार

उद्धव ठाकरे गटासाठी एक मोठा राजकीय धक्का मानला जात आहे. नगरसेविका विशाखा राऊत यांचे जात प्रमाणपत्र रद्द करण्यात आले आहे. यामुळे त्यांचे आरक्षित जागेवरील नगरसेवक पद रद्द होण्याची शक्यता निर्माण झाली आहे. जर विशाखा राऊत यांचे नगरसेवक पद रद्द झाले, तर ते प्रिया सरवणकर यांना मिळण्याची शक्यता वर्तवली जात आहे.

या घडामोडींच्या पार्श्वभूमीवर सदा सरवणकर हे प्रिया सरवणकर यांच्यासह मुख्यमंत्री एकनाथ शिंदे यांच्या भेटीसाठी नंदनवन निवासस्थानी पोहोचले होते. विशाखा राऊत यांनी या निर्णयावर आक्षेप नोंदवला असून, सत्ताधारी पक्षावर सत्तेचा दुरुपयोग करत असल्याचा आरोप केला आहे. पालघरमधून काढलेल्या जात प्रमाणपत्रावर प्रश्नचिन्ह उपस्थित केले जात असताना, त्यांनी प्रतिस्पर्धी प्रिया सरवणकर यांच्या वैभववाडी येथील जात प्रमाणपत्रावरही प्रश्नचिन्ह उपस्थित केले आहे. मात्र, जात पडताळणी समिती ही तटस्थ आणि स्वतंत्र असते, तिच्यावर कोणताही शासकीय दबाव नसतो, असा दावाही काही घटकांकडून करण्यात आला आहे. सर्व निर्णय गुणवत्तेनुसार (on merit) घेतले जातात, असेही स्पष्ट करण्यात आले आहे. ठाकरे गटाच्या नगरसेवकांची संख्या कमी करण्यासाठी हे जाणीवपूर्वक केले जात असल्याचा आरोपही विशाखा राऊत यांच्या समर्थकांनी केला आहे.