चालक कसाबसा निघाला, पण क्लिनर अडकला! डिझेल टँकरच्या आगीत जिवंत होरपळला

लातूर : लातूर-नांदेड महामार्गावर बुधवारी झालेल्या भीषण अपघातामध्ये डिझेल टँकर जळून खाक झाला. यासोबत रस्त्यावरील इतर वाहनांनीही पेट घेतला. तब्बल 7 वाहनं जळून खाक झाली. या आगीत एक जण मृत्युमुखी पडला. विशेष म्हणजे ज्या टँकरने ट्रॅक्टर ट्रॉलीला धडक दिली होती, त्या डिझेल टँकरचा चालक या अपघातातून बचावला. मात्र याच टँकरमधील त्याचा सहकारी क्लिनरवर मात्र काळाने घाला घातला.

डिझेलने भरलेला टँकर सोलापूर डेपोतून निघून अहमदपूरच्या दिशेने जात होता. लातूर-नांदेड महामार्गावर असताना डिझेल टँकर आणि ऊसाच्या ट्रॅक्टर ट्रॉलीत जबर धडक झाली. ही धडक इतकी भीषण होती, यानंतर डिझेल टँकरने पेट घेतला.

या अपघातानंतर डिझेल टँकर आता पेट घेईल, अशी भीती चालकाला होतीच. त्यामुळे तो कसाबसा या अपघातातून बचावला. त्यानं लगेचच डिझेल टँकरच्या बाहेर उडी टाकली. पण या अपघातात लागलेल्या आगीमध्ये टँकर चालकाच्या पायाला जबर जखम झाली. चालक जरी बचावला गेला असला, तरी त्याचा साथीदार मात्र टँकरमधून वेळेत बाहेर पडू शकला नाही. या दुर्दैवी घटनेत चालक जिवंत होरपळला आणि त्याचा मृत्यू झाला.

पाहा व्हिडीओ :

लातूरमध्ये तो अपघात नेमका कसा घडला? महेंद्र जोंधळे यांनी दिली महत्त्वाची माहिती, पाहा… डिझेल टँकर पेटला, सोबतच 7 गाड्यांची राख, एकाचा मृत्यू कसा झाला? ऐका… #Latur #Accident #Nanded @TV9Marathi pic.twitter.com/58ZlZ7wlwL

— Siddhesh Sawant (@ssidsawant) November 24, 2022

या अपघातात नांदेड येथून लातूरच्या दिशेने जाणाऱ्या एसटी बसलाही आगीने आपल्या कवेत घेतलं. शिवाय रस्त्यावरुन जाणाऱ्या दोन कार आणि एक ट्रॅक्टरमध्ये देखील आग भडकली होती. एकूण सात वाहनांची या भीषण अपघातात राख झाली.

या आगीमुळे महामार्गावर हाहाकार उडाला होता. अपघातादरम्यान दोन्ही बाजूकडील वाहतूकही थांबवण्यात आली होती. दीड तासांच्या अथक प्रयत्नांनंतर ही आग आटोक्यात आणण्यात आली. पण तोपर्यंत वाहनांचा कोळसा झाला होता.