Nagpur Murder : जुन्या वादातून नागपुरात तरुणाची हत्या, आरोपीने मृतदेहाचा फोटो काढून मित्राला पाठवला

नागपूर : नागपुरात गुन्हेगारी थांबवण्याचे नावच घेताना दिसत नाही. रविवारी आणखी एका तरुणाच्या हत्येची घटना घडली आहे. जुन्या वादातून नागपूर शहरातील काटोल रस्त्यावर एका तरुणा (Youth)ची भररस्त्यात धारदार शस्त्राने वार करुन हत्या (Murder) करण्यात आली आहे. नारायण गयाप्रसाद द्विवेदी असे हत्या करण्यात आलेल्या तरुणाचे नाव आहे. गिट्टीखदान पोलीस स्टेशन (Gittikhadan Police Station) आणि गुन्हेशाखा कार्यालयापासून काही अंतरावरच नारायण गयाप्रसाद द्विवेदी नावाच्या इसमाची निर्घृण हत्या करण्यात आली आहे. याप्रकरणी गिट्टीखदान पोलीस ठाण्यात अज्ञात आरोपींविरोधात हत्येचा गुन्हा दाखल झाला आहे.

हत्येनंतर आरोपींनी मृतदेहाचा फोटो काढून मित्राला पाठवला

शहरातील गजबजलेल्या काटोल रस्त्यावरुन मयत नारायण द्विवेदी हा दुचाकीने ड्युटीवर जाण्यासाठी निघाला होता. यावेळी अज्ञात आरोपींनी त्याच्यावर प्राणघातक हल्ला केला. आरोपींनी नारायण द्विवेदी याच्यावर अनेक वार केल्याने तो दुचाकीसह रस्त्यावरच कोसळला. यात त्याचा जागीच मृत्यू झाला. आरोपींनी नारायण गयाप्रसाद द्विवेदी याची हत्या केल्यानंतर मृतदेहाचा मोबाईलवर फोटो काढून तो मित्राला पाठवला. त्यानंतर आरोपी हे घटनास्थळावरून पसार झाले आहेत. काही दिवसांपूर्वी नारायण द्विवेदी हा सुरेंद्रगड वस्तीत भाड्याने राहत होते. दरम्यान, आरोपींनी नेमकी कोणत्या कारणावरुन नारायणची हत्या केली याचा पोलीस तपास करत आहेत. तसेच फरार आरोपींचाही शोध घेत आहेत. (A young man was killed by stabbing him with a sharp weapon due to an old dispute in Nagpur)