Saif Ali Khan attack : हल्ल्यापूर्वी नोकरी सोडली, चाकूही चोरला, सैफच्या हल्लेखोराबद्दल धक्कादायक माहिती उघड
सैफ अली खानवर झालेल्या घरात घुसखोरी आणि हल्ल्याच्या प्रकरणात आरोपी मोहम्मद शरीफुलला अटक करण्यात आली आहे. शरीफुल हा बांगलादेशी नागरिक असून मुंबईत बोगस आधारकार्डने आला होता. सैफची प्रकृती आता सुधारली असून त्यांना रुग्णालयातून डिस्चार्ज मिळाला आहे. याप्रकरणी आता महत्वाची माहिती समोर आली आहे.
अभिनेता सैफ अली खानवर घरात घुसलेल्या चोराने जीवघेणा हल्ला केल्याच्या घटनेला आठवड्याभराचा कालावधी आता उलटला आहे. हल्ल्यानंतर गंभीर जखमी झालेल्या सैफला लीलावती रुग्णालयात दाखल करण्यात आलं तेथे त्याच्यावर शस्त्रक्रियाही झाली. त्याची प्रकृती आता सुधारली असून अखेर काल (मंगळवारी) सैफला हॉस्पिटलमधून डिस्चार्ज देण्यात आला आणि तो त्याच्या घरी परतला. सध्या त्याला बेडरेस्ट सांगितली असून महिन्याभरात तो बरा होईल असे समजते. दरम्यान सैफवर ज्याने हल्ला केला तो आरोपी मोहम्मद शरीफुल याला रविवारी पहाटे ठाण्यातील लेबर कॅम्प परिसरातून अटक करण्यात आली. त्याला 23 जानेवारी पर्यंत पोलीस कोठडी मिळाली आहे. द
दरम्यान याच शरीफुलबद्दल काही महत्वाचे खुलासे झाले आहेत. मूळचा बांगलादेशचा रहिवासी असलेला हा आरोपी भारतात आल्यानंतर काही काळ पश्चिम बंगालमध्ये रहात होता. त्यानंतर तिथे बोगस आधारकार्ड बनवून तो मुंबईत आला आणि येथे काम शोधू लागला. सैफवर हल्ला करण्याआधी तो एके ठिकाणी काम करत होता, मात्र हल्ल्याच्या काही दिवस आधीच त्याने हे काम सोडले होते अशी माहिती समोर आली होती. एवढेच नव्हे तर कामाच्या ठिकाणाहून आरोपीने एक चाकूही चोरला होता, तोच चाकू बॅगेत घेऊन तो वावरत होता अशी माहिती देखील उघड झाली आहे.
सैफवर हल्ला केल्यानंतर आरोपी त्याच्या घरातून पळून गेला, मात्र तो 2 तास सैफच्याच इमारतीच्या गार्डनमध्ये लपून बसला होता, त्यानंतर तो काही वेळासाठी वांद्रेच्या बँड स्टॅन्ड येथे गेला ,तेथे काही वेळ बसला. तेथून तो चालत चालत वांद्रे परिसरात पुन्हा आला आणि फरार झाला अशीही माहिती उघड झाली.
मोहम्मद शरीफुलची टोपी महत्वाचा पुरावा
मोहम्मद शरीफुलची टोपी महत्वाचा पुरावा ठरणार आहे असे समजते. जेव्हा मोहम्मद हा इमारतीच्या पायऱ्या चढून चालत गेला तेव्हा त्याने आपल्या बॅगेत टोपी ठेवली होती. मात्र सैफ अली खान च्या घरात जेव्हा झटापट झाली. तेव्हा त्याच्या डोक्यावर टोपी होती. त्यामुळे आता तीच टोपी ही महत्वाचा पुरावा ठरणार आहे. दरम्यान हल्लेखोर मोहम्मद शरीफुलची ओळख पटवण्यासाठी पोलिसांनी फेशियल आयडी प्रणालीचा वापर केला असल्याची माहिती देखील समोर आली आहे.
सैफ हल्ला प्रकरणातील तपास अधिकारी बदलला
सैफ अली खानवर हल्ल्याप्रकरणी तपास करणारा पोलीस अधिकारी बदलण्यात आला आहे. हा तपास अधिकारी का बदलला त्याची माहिती अद्याप समोर आलेली नाही.या प्रकरणाचा तपास पीआय दर्जाचे अधिकारी सुदर्शन गायकवाड करत होते. मात्र त्यांच्याऐवजी आता अजय लिंगनूरकर हे या प्रकरणाचा तपास करणार आहेत. नुकतीच त्यांची नियुक्ती करण्यात आली आहे. आता या प्रकरणातील तपास अधिकारी का बदलण्यात आले, त्यामागचे कारण काय, याची माहिती समोर आलेली नाही.
सैफ घरी आल्यावर फ्लॅटला लायटिंगचा झगमगाट
आठवडाभर रुग्णालयात घालवल्यानंतर आणि जीवघेण्या हल्ल्यातून वाचल्यानंतर सैफ अखेर काल घरी परतला. तो सुखरूप घरी परत आल्यानंतर सद्गुरू शरण या इमारतीतील त्याच्या फ्लॅटला लायटिंग करण्यात आल्याने सर्वत्र झगमगाट होता. सैफ अली खान याच्या स्वागतासाठी १२ व्या मजल्याला लायटिंग करण्यात आली. सैफ रुग्णालयात असल्याने 12 वा मजला मागचे काही दिवस अंधारात होता. आता सैफ अली खान आपल्या घरी परतल्याने खान फ्लॅट रोषणाईने झगमगत आहे.
लीलावती रुग्णालयातील स्टाफ सैफ अली खानच्या घरात दाखल
सैफ अली खानच्या घरात लीलावती रुग्णालयाचा स्टाफ दाखल झाला आहे. रुटीन चेकअप, ब्लड प्रेशर मापन आणि औषध वेळेवर देण्यासाठी स्टाफ आल्याची माहिती समोर आली आहे.
