कुख्यात गँगस्टर इजाज लकडावाला 2 कोटींच्या खंडणीचं प्रकरण भोवलं, ठाणे पोलिसांकडून अटक

कल्याण येथील व्यावसायिकाकडून दोन कोटींची खंडणी मागितल्या प्रकरणी इजाज लकडावाला अटक झाली आहे. Ezaz Lakdawala Thane Police

कुख्यात गँगस्टर इजाज लकडावाला 2 कोटींच्या खंडणीचं प्रकरण भोवलं, ठाणे पोलिसांकडून अटक
एजाज लकडावाला

ठाणे: कल्याण येथील व्यावसायिकाकडून दोन कोटींची खंडणी मागितल्या प्रकरणी इजाज लकडावाला अटक झाली आहे. छोटा राजन टोळीतील कुख्यात गँगस्टर इजाज लकडावाला यास ठाणे खंडणी विरोधी पथकाने नुकतीच अटक केली आहे. लकडावाला याच्यावर खून, खुनाचा प्रयत्न, खंडणी असे तिसहून अधिक गंभीर स्वरूपाचे गुन्हे दाखल आहेत.(Thane Police arrested Ezaz Lakdawala in two crore ransom case)

8 जानेवारी 2020 मध्ये लकडावाला यास मुंबई पोलिसांनी बिहार येथून अटक केली होती. तो तेव्हा पासून तळोजा कारागृहात आहे. ठाणे पोलिसांच्या खंडणी विरोधी पथकाने त्यास तळोजा कारागृहातून चौकशीसाठी ताब्यात घेतले आहे. याच खंडणी प्रकरणात इजाज याचा चुलत भाऊ नदीम लकडावाला याचे देखील नाव समोर आले असून त्यास देखील लवकरच ताब्यात घेण्यात येणार असल्याची माहिती ठाणे खंडणी विरोधी पथकाचे वरिष्ठ पोलीस निरीक्षक राजकुमार कोथमिरे यांनी दिली.

मुंबईत 25 तर ठाण्यातही गुन्हे

इजाज लकडावाला हा मुंबईतल्या नागपाडा भागात राहत असल्याने त्याचे अनेक गँगस्टर बरोबर संबंध होते. मात्र, दाऊद व छोटा राजन टोळीत वैमनस्य पेटल्यानंतर इजाज छोटा राजन टोळीत सामील झाला होता. इजाजवर खून, खुनाचा प्रयत्न, खंडणी असे गंभीर स्वरूपाचे 25 गुन्हे मुंबईत दाखल आहेत. तर ठाण्यात देखील त्याच्या विरोधात 5 ते 6 गुन्हे दाखल असल्याची माहिती पोलिसांनी दिली.

इजाज याच्यावर मुंबई पोलिसांनी मोक्का कायद्या अंतर्गत कारवाई केल्यानंतर तो मुंबईतून फरार झाला होता. मात्र, मुंबई पोलिसांनी जानेवारी 2020 मध्ये त्याच्या बिहारमधून मुसक्या आवळल्या होत्या. तो तेव्हा पासून तळोजा कारागृहात बंद आहे.

दरम्यान, कल्याण मधील एका दूध व्यावसायिकाकडून 2 कोटींची खंडणी मागितल्या प्रकरणी कल्याणच्या बाजारपेठ पोलीस ठाण्यात इजाज व नदीम लकडावाला ब्रदर्स विरोधात गुन्हा दाखल करण्यात आला आहे. या प्रकरणात चौकशीसाठी ठाणे खंडणी विरोधी पथकाने इजाज यास तळोजा कारागृहातून विशेष मोक्का न्यायालयाच्या परवानगीने ताब्यात घेतले आहे, अशी माहिती ठाणे खंडणी विरोधी पथकाचे पोलीस निरीक्षक राजकुमार कोथमिरे यांनी दिली.

संबंधित बातम्या:

इंटरनेटवर नोकरीची जाहीरात, तरुणी सेक्स रॅकेटमध्ये अडकल्या!, नागपूर पोलिसांकडून आरोपी गजाआड

सावधान, तुम्हीही बियर बारमध्ये ATM कार्ड स्वाईप करताय?

(Thane Police arrested Ezaz Lakdawala in two crore ransom case)

Published On - 6:39 pm, Tue, 9 February 21

Click on your DTH Provider to Add TV9 MARATHI