ना गाजावाजा, ना मोठा स्टार, तरी ‘हा’ चित्रपट जिंकतोय प्रेक्षकांची मनं; एका राज्यात थेट टॅक्स फ्री

एखादा चित्रपट जर खरंच चांगला असेल तर कोणत्याही प्रमोशनशिवाय तो प्रेक्षकांना थिएटरपर्यंत खेचून आणू शकतो, हे ‘कृष्णावतारम : पार्ट 1 हृदयम’ने सिद्ध केलं आहे. कोणत्याही मोठ्या स्टारशिवाय, प्रमोशनशिवाय प्रेक्षकांच्या भेटीला आलेला हा चित्रपट थिएटरमध्ये दमदार कामगिरी करतोय. सुरुवातीला गुरुवारी फक्त 500 शोजसह हा चित्रपट प्रदर्शित झाला. त्यानंतर प्रेक्षकांच्या सकारात्मक प्रचारामुळे त्याला चांगला फायदा मिळू लागला आहे. पहिल्या दिवसापासून ‘कृष्णावतारम’ला चांगले रिव्ह्यू मिळाले आणि शुक्रवारपासून त्याच्या शोजमध्ये वाढ करण्यात आली. शुक्रवारच्या तुलनेत या चित्रपटाची कमाई शनिवारी दुप्पट झाली. हार्दिक गज्जर दिग्दर्शित या चित्रपटाने पहिल्या दिवशी फक्त 40 लाख रुपये कमावले होते.

प्रेक्षकांकडून चांगला प्रतिसाद मिळत असल्याचं पाहून थिएटर मालकांनी या चित्रपटाचे शोज वाढवले. शुक्रवारी ‘कृष्णावतारम’चे 1500 शोज चालले आणि त्यादिवशी कमाईसुद्धा 1.15 कोटी रुपये झाली. शनिवारी ही कमाई दुपटीने वाढून 2.25 कोटी रुपये इतकी झाली. कलेक्शनचा हा आकडा जरी लहान दिसत असला तरी शोजच्या तुलनेत ही कामगिरी चांगली आहे. शनिवारी या चित्रपटाचे शोज 1700 च्या जवळपास होते. म्हणजेच प्रत्येक दिवशी या चित्रपटाचे शोज, शोजमधील गर्दी आणि कमाई या तिन्ही गोष्टी वाढत आहेत.

पहा ट्रेलर-

‘कृष्णावतारम’मध्ये भगवान श्रीकृष्ण यांची कथा दाखवण्यात आली असून यामध्ये सिद्धार्थ गुप्ता, सुष्मिता भट, संस्कृती जायना आणि निवाशियनी कृष्णन यांच्या मुख्य भूमिका आहेत. मर्यादित बजेट असूनही या चित्रपटातील व्हिज्युअल्स, व्हीएफएक्स, संगीत दमदार असल्याचं म्हटलं जात आहे. विशेष म्हणजे उत्तर प्रदेशचे मुख्यमंत्री योगी आदित्यनाथ यांनी रविवारी लखनौ इथल्या लोकभवन सभागृहात या चित्रपटाच्या विशेष स्क्रिनिंगला उपस्थित राहिल्यानंतर तो उत्तर प्रदेशमध्ये टॅक्स फ्री करण्यात आल्याची घोषणा केली.

“हा चित्रपट भगवान श्रीकृष्ण यांचं जीवन मानवी दृष्टीकोनातून सादर करतो. द्वापार काळ, सनातन संस्कृती आणि भारतीय परंपरा यांचं चित्रण अत्यंत भव्यतेनं करण्यात आलं आहे. या चित्रपटात राधा, रुक्मिणी आणि सत्यभामा यांच्या कथा दाखवण्यात आल्या आहेत”, असं योगी आदित्यनाथ म्हणाले. इतकंच नव्हे तर त्यांनी प्रत्येक जिल्ह्यात या चित्रपटाचं विशेष प्रदर्शन आयोजित कण्याचे निर्देश माहिती व प्रसारण विभागाला दिले आहेत. ‘कृष्णावतारम पार्ट 1: हृदयम’ हा चित्रपट 7 मे रोजी हिंदी, तमिळ आणि तेलुगू भाषांमध्ये प्रदर्शित झाला.