Parveen Babi: परवीन बाबी यांच्या मुंबईतील फ्लॅटला खरेदीदारच मिळेना!
मुंबईतील 'या' ठिकाणी राहायचं अनेकांचं स्वप्न; भाडेकरूही का देतात नकार?
अभिनेत्री परवीन बाबीची (Parveen Babi) एक झलक पाहण्यासाठी त्याकाळी लोक अक्षरश: वेडे व्हायचे. परवीन यांना मेहनतीच्या जोरावर बॉलिवूड (Bollywood) इंडस्ट्रीत यश आणि प्रसिद्धी मिळाली. पण कॅमेऱ्याच्या या चकाकीमागे एक वेगळंच जग असतं. ज्याची ओळख परवीन यांच्या मृत्यूपूर्वी आणि नंतरही झाली. परवीन एकट्याच राहत होत्या. जेव्हा त्या मानसिक आजाराशी लढत होत्या तेव्हा त्यांच्या आजूबाजूला कोणीही नव्हतं. त्यांच्या निधनानंतरही तीन दिवस कोणालाच काही कळलं नव्हतं.
ज्या फ्लॅटमध्ये परवीन यांचा मृत्यू झाला, तो फ्लॅट मुंबईतील अतिशय सुंदर ठिकाणी आहे. जुहूमध्ये समुद्राच्या किनाऱ्याजवळ हा फ्लॅट आहे. पण परवीन यांचा हा फ्लॅट विकत घेण्यास लोक कचरत आहेत. त्यांच्या फ्लॅटसाठी खरेदीदारच सापडत नाहीये. इतकंच नव्हे तर तो फ्लॅट कोणी भाड्यानेही घ्यायला तयार नाही.
परवीन बाबी यांचा मृतदेह ज्या फ्लॅटमध्ये सापडला, तो मुंबईतील जुहू भागातील रिव्हिएरा बिल्डिंगच्या सातव्या मजल्यावर आहे. ही इमारत प्रसिद्ध जुहू बीचवर आहे. हा टेरेस फ्लॅट आहे. “हा फ्लॅट केवळ विक्रीसाठी नाही तर भाड्यानेही उपलब्ध आहे. त्याची 15 कोटी रुपयांना विक्री होऊ शकते. जर एखाद्याला भाड्याने हे घर घ्यायचं असेल तर दरमहा 4 लाख रुपये भाडं द्यावं लागेल,” अशी माहिती ‘नवभारत टाइम्स’ने दिली.
2014 मध्ये अग्रवाल हा भाडेकरू या फ्लॅटमध्ये राहत होता. परंतु फ्लॅटचा व्यावसायिक कारणांसाठी वापर केल्याचा आरोप झाल्यानंतर तो अडचणीत आला. तो त्याच्या कुटुंबासह या फ्लॅटमध्ये राहत होता. मात्र त्याला ताबडतोब निघून जाण्यास सांगण्यात आलं.
