Kisi Ka Bhai Kisi Ki Jaan : प्रेक्षकांचं मनोरंजन करण्यास सलमान खान फेल! पहिल्या दिवशी सिनेमाने कमावले फक्त इतकेच रुपये…

मुंबई : गेल्या काही दिवसांपासून अभिनेता सलमान खान स्टारर ‘किसी का भाई किसी की जान’ सिनेमाची चर्चा रंगत होती. भाईजानचा नवा सिनेमा येत असल्यामुळे चाहत्यांमध्ये उत्साहाचं वातावरण होतं. अखेर अनेक दिवसांनंतर अभिनेता सलमान खान याचा ‘किसी का भाई किसी की जान’ सिनेमा मोठ्या पडद्यावर प्रदर्शित झाला. चार वर्षांच्या प्रतीक्षेनंतर सलमान चाहत्यांच्या भेटीस आला. ईदचं मुहूर्त साधत अभिनेत्याचा सिनेमा प्रदर्शित झाला. पण यावेळी भाईजान प्रेक्षकांचं मनोरंजन करण्यास अपयशी ठरल्याचं समोर येत आहे. प्रदर्शनाच्या पहिल्या दिवशी सिनेमा बॉक्स ऑफिसवर अपयशी ठरला. बॉक्स ऑफिसवर सिनेमाने केलेल्या कमाईचे आकडे देखील समोर आले आहेत.

‘किसी का भाई किसी की जान’ सिनेमा भारतात एकून ४ हजार ५०० स्क्रिनवर प्रदर्शित करण्यात आला आहे. एवढंच नाही तर, परदेशाच सिनेमा १ हजार २०० प्रदर्शित करण्यात आला आहे. असं असताना देखील सिनेमा समाधानकारक कमाई करु न शकल्यामुळे निर्माते आणि दिग्दर्शकांनी निराशा व्यक्त केल्याची चर्चा जोर धरत आहे.

सलमान खान याच्या ‘भारत’ आणि ‘टायगर जिंदा हैं’ सिनेमाने प्रेक्षकांचं प्रचंड मनोरंजन केलं. पण ‘किसी का भाई किसी की जान’ सिनेमा येत्या दिवसांत किती कोटी रुपयांपर्यंत मजल मारेल हे पाहणं महत्त्वाचं ठरणार आहे. रिपोर्टनुसार, सिनेमाने बॉक्स ऑफिसवर प्रदर्शनानंतर पहिल्या दिवशी फक्त १२ ते १३ कोटी रुपयांचा गल्ला गोळा केला आहे.

‘किसी का भाई किसी की जान’ सिनेमाच्या कमाईचा पहिल्या दिवसाचा आकडा इतर सिनेमांच्या तुलनेत फार कमी आहे. सलमान खान स्टारर ‘भारत’ सिनेमाने पहिल्यादिवशी तब्बल ४३.३० कोटी रुपयांचा गल्ला जमा केला. ‘भारत’ सिनेमा देखील ईदच्या मुहूर्तावर प्रदर्शित करण्यात आला होता. त्यामुळे ‘किसी का भाई किसी की जान’ येत्या दिवसात किती कमाई करेल आणि शनिवार, रविवार असल्याचा भाईजानला फायदा होणार की नाही, हे पाहणं महत्त्वाचं ठरणार आहे.

‘किसी का भाई किसी की जान’ सिनेमात सलमान खान याने ‘भाईजान’ या भूमिकेला न्याय दिला आहे. सिनेमात सलमान प्रेयसीसाठी गुंडासोबत लढत असल्याचं दिसत आहे. सिनेमात सलमान, अभिनेत्री पूजा हेगडे यांच्यासोबत सिद्धार्थ निगम, राघव जुयाल, शहनाज गिल, पलक तिवरी महत्त्वाच्या भूमिकेतून चाहत्यांच्या भेटीस आले आहेत. सिनेमाला चाहते आणि विश्लेषकांकडून संमिश्र प्रतिसाद मिळत आहे.