सिद्धू मूसेवालाच्या आईला अचानक ब्लीडिंग..; 58 व्या वर्षी गरोदरपणात आल्या होत्या समस्या
मार्च महिन्यात दिवंगत पंजाबी गायक सिद्धू मूसेवालाची आई चरणकौर सिंह यांनी वयाच्या 58 व्या वर्षी दुसऱ्या बाळाला जन्म दिला. सिद्धूचे वडील बलकौर सिंह यांनी सोशल मीडियाद्वारे चाहत्यांना ही गुड न्यूज दिली होती.
दिवंगत पंजाबी गायक सिद्धू मूसेवालाच्या आईने वयाच्या 58 व्या वर्षी मार्च महिन्यात दुसऱ्या बाळाला जन्म दिला. नुकत्याच दिलेल्या एका मुलाखतीत सिद्धूचे वडील बलकौर सिंग यांनी पत्नीच्या गरोदरपणात आलेल्या समस्यांविषयी सांगितलं. सिद्धूच्या निधनाच्या दोन वर्षांनंतर त्याच्या आईवडिलांनी पुन्हा एकदा पालक होण्याचा निर्णय घेतला. IVF म्हणजेच विट्रो फर्टिलायजेशनच्या मदतीने चरणकौर या आई बनू शकल्या. 17 मार्च रोजी चरण कौर आणि बलकौर सिंग यांच्या घरात चिमुकल्या पाहुण्याचं आगमन झालं. मात्र वयाच्या 58 व्या वर्षी हे गरोदरपण सोपं नव्हतं. चरण कौर यांना दररोज विविध इंजेक्शन्स घ्यावे लागायचे, असं सिद्धूच्या वडिलांनी सांगितलं.
पत्नीच्या गरोदरपणातील घटनेबद्दल सांगताना ते पुढे म्हणाले, “एके रात्री अचानक मोठ्या प्रमाणात रक्तस्राव होऊ लागला होता. त्यावेळी भटिंडामधील खासगी रुग्णालयात नेईपर्यंत माझा जीव टांगणीला लागला होता. जर त्यादिवशी तिला काही झालं असलं तर मी माझं सर्वस्व गमावलं असतं. मला हे मान्य करावं लागेल की ज्याप्रकारे माझ्या पहिल्या मुलाला त्याचं बालपण मोकळेपणे जगता आलं, तसं माझ्या या दुसऱ्या मुलाला मोकळेपणे राहता येणार नाही. कारण तो सतत लोकांच्या नजरेत असेल. तो मुक्तपणे इथे-तिथे फिरु शकणार नाही, सर्वसामान्यांप्रमाणे व्हॅनमध्ये शाळेत जाऊ शकणार नाही.”
View this post on Instagram
सिद्धू मूसेवालाची 29 मे 2022 रोजी मनसा जिल्ह्यात गोळ्या झाडून हत्या करण्यात आली होती. काँग्रेस पक्षाच्या तिकिटावरून त्याने मनसा मतदारसंघात पंजाब विधानसभा निवडणूक लढवली होती. राज्य सरकारने सिद्धू मूसेवालाची सुरक्षाव्यवस्था काढून घेतल्याच्या दुसऱ्याच दिवशी त्याच्यावर गोळीबार झाला होता. सिद्धूच्या हत्येप्रकरणी 31 जणांवर आरोप करण्यात आले होते. ज्यामध्ये गँगस्टर लॉरेन्स बिश्नोई आणि गोल्डी ब्रार यांचाही समावेश होता. तर आतापर्यंत याप्रकरणात 25 जणांना अटक करण्यात आली आहे.सिद्धू मूसेवाला हा पंजाबमधील अत्यंत प्रसिद्ध गायक आणि रॅपर होता. तो स्वत:च त्याची गाणी लिहायचा आणि त्यांची निर्मिती करायचा. तो सर्वांत श्रीमंत पंजाबी गायकांपैकी एक होता.
