पेड प्रमोशनशिवाय युट्यूब चॅनल बनवा लोकप्रिय! फक्त ‘या’ ट्रिक्स वापरा
युट्यूब चॅनल चालू केलं की सुरुवातीला प्रत्येकाला संघर्ष करावा लागतो पण योग्य प्लॅनिंग, चांगलं कंटेंट, स्मार्ट प्रमोशन आणि प्रेक्षकांशी प्रामाणिक संवाद ठेवल्यास पेड प्रमोशनशिवायही युट्यूबवर यशस्वी होता येतं. फक्त संयम आणि सातत्याची गरज असते. त्यामुळे या टीप्स फॉलो करा आणि चॅनल चुटकीत फेमस करा.
सध्याच्या डिजिटल युगात युट्यूब हे केवळ मनोरंजनाचेच नव्हे तर करिअर आणि कमाईचे प्रभावी माध्यम बनले आहे. मात्र, सुरुवातीच्या काळात बहुतांश क्रिएटर्सना व्ह्यूज आणि सबस्क्राइबर वाढवण्यात मोठा संघर्ष करावा लागतो. पेड प्रमोशनसाठी पैसे खर्च करण्याऐवजी काही स्मार्ट आणि प्रभावी टिप्स वापरून तुम्ही नैसर्गिकरीत्या तुमच्या चॅनलची लोकप्रियता वाढवू शकता. चला तर मग जाणून घेऊया अशाच काही प्रभावी युक्त्या.
1. थंबनेल आणि टायटल ठरवतो यशाचा पहिला टप्पा
प्रत्येक युजरला तुमच्या व्हिडिओवर क्लिक करण्यासाठी सर्वात आधी आकर्षक थंबनेल आणि टायटल दिसतो. त्यामुळे थंबनेलमध्ये मोठ्या फॉन्टमध्ये मजकूर, आकर्षक एक्सप्रेशन्स आणि उच्च दर्जाचे इमेजेस वापरा. टायटलमध्ये कुतूहल निर्माण करा पण अतिशयोक्ती किंवा clickbait पासून टाळा. उदाहरणार्थ, “३ दिवसांत १० हजार सबस्क्राइबर मिळवण्याचा माझा गुपित फॉर्म्युला” असा टायटल आकर्षक ठरतो.
2. योग्य कीवर्डचा वापर करा
युट्यूब हे एक प्रकारचे सर्च इंजिन असल्याने टायटल, डिस्क्रिप्शन आणि टॅग्समध्ये प्रेक्षक शोधत असलेले कीवर्ड वापरणं खूप महत्त्वाचं असतं. यासाठी Google Trends किंवा TubeBuddy सारख्या टूल्सचा वापर करून ट्रेंडिंग कीवर्ड शोधा. डिस्क्रिप्शनमध्ये २-३ वेळा हे कीवर्ड समाविष्ट करा आणि टॅग्समध्येही तुमच्या विषयाशी संबंधित शब्दांचा समावेश करा.
3. तुमच्या Niche च्या कम्युनिटीमध्ये सहभागी व्हा
तुमच्या विषयाशी संबंधित इतर युट्यूब चॅनल्सचे व्हिडिओ बघा, त्यावर कमेंट करा, कंटेंट शेअर करा. यामुळे त्या कम्युनिटीमध्ये तुमचं नाव तयार होईल आणि नवीन प्रेक्षक तुमच्या चॅनलकडे आकर्षित होतील. शिवाय, प्रेक्षकांशी कमेंटद्वारे संवाद साधा, पोल घ्या, कम्युनिटी टॅबमध्ये सक्रिय रहा.
4. इतर सोशल मीडिया प्लॅटफॉर्मचा वापर करा
तुमचे व्हिडिओ Facebook ग्रुप्स, Telegram चॅनेल्स, WhatsApp ग्रुप्स, Reddit आणि Quora यांसारख्या प्लॅटफॉर्मवर शेअर करा. मात्र हे करताना स्पॅमिंग टाळा. केवळ त्या ग्रुप्समध्ये शेअर करा जिथे लोक तुमच्या विषयाशी संबंधित माहिती शोधतात.
5. सातत्य ठेवा आणि वेळेचं नियोजन करा
युट्यूबवर नियमितता हे यशाचं गमक आहे. आठवड्यातून किमान एक व्हिडिओ ठराविक दिवशी आणि वेळेला अपलोड करा. यामुळे प्रेक्षकांना तुमच्या व्हिडिओची सवय लागते आणि ते दरवेळी नवीन कंटेंटची वाट बघतात.
