कधीकाळी राहुल गांधींशी जोडलेलं नाव, आता पंजाबची सून होणार आमदार अदिती सिंह

नवी दिल्ली: उत्तरप्रदेशमधील रायबरेलीच्या काँग्रेस आमदार अदिती सिंह (Congress MLA Aditi Singh marriage) लवकरच लग्नबेडीत अडकणार आहेत. त्यांचं पंजाबचे आमदार अंगद सैनी यांच्याशी लग्न ठरलं आहे. 21 नोव्हेंबरला नवी दिल्लीत हा लग्न समारंभ होणार आहे. यानंतर दोन दिवसांनी (23 नोव्हेंबर) त्यांच्या लग्नाचं रिसेप्शन आयोजित करण्यात येणार आहे.

अंगद सैनी आणि अदिती सिंह या दोघांच्याही राजकीय प्रवासाला सोबतच सुरुवात झाली. दोघेही 2017 मध्ये आमदार झाले. अंगद सैनी पंजाबमधील शहीद भगत सिंह नगर विधानसभा मतदारसंघातून आमदार आहेत. तरुण आमदार म्हणून अंगद यांची पंजाबमध्ये ओळख आहे. ते नवांशहर येथून 9 वेळा जिंकून येणाऱ्या दिलबाग सिंह यांच्या कुटुंबाचे सदस्य आहेत.

अदिति सिंह देखील उत्तर प्रदेशमधील सर्वात तरुण आमदारांपैकी एक आहेत. त्यांनी 2017 मध्ये 90,000 हून अधिक मताधिक्याने रायबरेली सदर येथून विजय मिळवला. त्यांचे वडील अखिलेश कुमार सिंह यांनी 5 वेळा रायबरेलीचे प्रतिनिधीत्व केलेले आहे.

अदिती सिंह मध्यंतरीच्या काळातच बऱ्याच चर्चेत राहिल्या. त्यावेळी त्यांचं नाव काँग्रेसचे माजी अध्यक्ष राहुल गांधी यांच्याशी जोडलं गेलं होतं. मात्र, या चर्चा केवळ अफवा असल्याचं स्पष्ट करत अदिती सिंह यांनी हे वृत्त फेटाळलं होतं. तसेच राहुल गांधी हे माझे भाऊ असल्याचं म्हणत गांधी कुटुंबाशी आमचे जुने कौटुंबिक संबंध असल्याचं म्हटलं होतं.