संक्रांतवर संक्रात… वाल्मिक कराडला चोहोबाजूने ‘धस’का; कोर्टात आणि दिवसभरात काय काय घडलं?

मोठी बातमी समोर येत आहे. मस्साजोगचे सरपंच संतोष देशमुख यांच्या हत्याप्रकरणात यापूर्वी आठ आरोपींवर मकोका अंतर्गत कारवाई करण्यात आली होती. मात्र वाल्मिक कराडवर मकोका लावण्यात आला नव्हता. वाल्मिक कराड याच्यावर देखील मकोका लावण्यात यावा अशी मागणी देशमुख यांच्या कुटुंबाकडून करण्यात आली होती. अखरे आज वाल्मिक कराडवर देखील मकोका अंतर्गत कारवाई करण्यात आली आहे. वाल्मिक कराडवर मकोका लावण्यात आल्यानंतर परळीमधील वातावरण चांगलंच तापलं आहे.

दिवसभरात नेमकं काय घडलं? 

आज वाल्मिक कराड याची सीआयडी कोठडी संपल्यामुळे त्याला कोर्टात हजर करण्यात आलं होतं. त्यानंतर कोर्टानं त्याला खंडणीप्रकरणात न्यायालयीन कोठडी सुनावली. मात्र त्यानंतर त्याच्यावर मकोका अंतर्गत कारवाई करण्यात आली. मकोका अंतर्गत कारवाई करण्यात आल्यामुळे कराडच्या अडचणीत वाढ झाली आहे, कोर्टानं वाल्मिक कराडचा ताबा घेण्याची परवानगी एसआयटीला दिली आहे. आता उद्या हत्येच्या गुन्ह्यात कराडला कोर्टात हजर केलं जाणार आहे.

दरम्यान एकीकडे हे सर्व सुरू असताना दुसरीकडे परळीमध्ये वाल्मिक कराड याचे समर्थक आज सकाळपासूनच रस्त्त्यावर उतरले आहेत. आंदोलक चांगलेच आक्रमक झाले. पाण्याच्या टाकीवर चढून आंदोलन करण्यात आलं. या आंदोलनादरम्यान एका आंदोलकाला भोवळ देखील आल्याची घटना घडली. वाल्मिक कराडच्या आईनं देखील आज परळीमध्ये ठिय्या आंदोलन केलं. मात्र या आंदोलनादरम्यान त्यांची प्रकृती खालावली आहे. वाल्मिक कराडवर मकोका अंतर्गत कारवाई झाल्याची बातमी समोर येताच परळीमध्ये समर्थकांकडून बंदची हाक देण्यात आली.

परळीमध्ये सर्वत्र शूकशुकाट पाहायला मिळत आहे, सर्व दुकानं बंद करण्यात आले आहेत.  कराड समर्थक रस्त्यावर उतरले आहेत. परळीमध्ये जोरदार आंदोलन सुरू आहे. दरम्यान उद्या  हत्येच्या गुन्ह्यात कराडला कोर्टात हजर केलं जाणार आहे.  कोर्ट काय निर्णय देणार याकडे आता सर्वांचं लक्ष लागलं आहे.  संतोष देशमुख यांच्या कुटुंबाकडून सातत्यानं वाल्मिक कराड याच्यावर मकोका अंतर्गत कारवाई करण्यात यावी अशी मागणी करण्यात येत होती.  अखेर त्याच्यावर मकोका लावण्यात आला आहे.