Darekar On Raut: खोतकरांची हाताची घडी, सत्तार हिंदुत्वाची भूमिका मांडतात, दरेकरांचं सूचक वक्तव्य
एमआयएमचे खासदार इम्तियाज जलील यांनी एमआयएमला महाविकास आघाडीत घेण्याचा प्रस्ताव ठेवला आहे. त्यावरून राजकीय टोलेबाजी सुरू झाली आहे. आता विधान परिषदेचे विरोधी पक्षनेते प्रवीण दरेकर यांनीही सूचक विधान केलं आहे.
मुंबई: एमआयएमचे खासदार इम्तियाज जलील (imtiyaz jaleel) यांनी एमआयएमला (mim) महाविकास आघाडीत (mahavikas aghadi) घेण्याचा प्रस्ताव ठेवला आहे. त्यावरून राजकीय टोलेबाजी सुरू झाली आहे. आता विधान परिषदेचे विरोधी पक्षनेते प्रवीण दरेकर यांनीही सूचक विधान केलं आहे. शिवसेना नेते संजय राऊत जे बोलत आहेत. तो त्यांचा बदललेला हिंदुत्वादी विचार आहे. त्यांना सत्य पचनी पडत नाही. शिवसेना हतबल झाली आहे. त्यांचे हिदुत्वाबद्दलची विधाने गांभीर्याने घेऊ नयेत. शिवसेनेला संगतीचा परिणाम झालेला दिसतोय. शिवसेनेचे नेते अर्जुन खोतकर हाताची घडी घालून उभे राहतात आणि अब्दूल सत्तार शिवसेनेची हिंदुत्वाची भूमिका मांडतात… यातच सगळं आलं…, असं सूचक विधान करत प्रवीण दरेकर यांनी शिवसेनेला डिवचलं आहे. 370 कलम हटवल्याने स्वप्नातला काश्मीर पुन्हा बहाल झाला आहे. तो राऊतांनी पाहावा, असा टोलाही त्यांनी लगावला आहे.
प्रवीण दरेकर यांनी सहकार क्षेत्रातील घोटाळ्यावरही प्रतिक्रिया व्यक्त केली. त्यांना काही फरक पडत नसेल पण मी वस्तूस्थिती मांडणार. बोगस सभासद किती, संस्था हायजॅक कशी केली ही सगळी माहिती मी देणार. सहकार चळवळ राज्यात ठेवायची की नाही? ही चळवळ नष्ट करण्याचा प्रयत्न आहे. विधान भवनात उद्या मी जाणार आहे. यावेळी सभापतींना खुलासा करण्याची विनंती करणार आहे. सहकार क्षेत्रातील घोटाळे बाहेर काढणार आहे, असं प्रवीण दरेकर यांनी सांगितलं.
किती आमदार फुटणार ते आधी ठरवा
राज्यात मविआचा जनतेला वीट आला आहे. भाजपच्या बाजूने सध्याचे वातावरण आहे. भाजपचे 25 आमदार फुटणार की 50 आधी ते ठरवा. शिवसेनेत कमालीची अस्वस्थाता आहे. कधीही एक गट बाहेर पडेल हे सांगता येत नाही, असा दावा त्यांनी केला. मात्र, शिवसेनेतील या अस्वस्थतेचा फायदा घेणार नाही, असं सांगतानाच या अस्वस्थतेचा विस्फोट येत्या काही दिवसातच होणार असल्याचा गौप्यस्फोटही त्यांनी केला.
शिवसेनेच्या खात्यांना फक्त 13 टक्के निधी
शिवसेनेच्या खात्यांना 13 टक्के निधी मिळालाय. 60 टक्के निधी राष्ट्रवादीला मिळाला आहे. विकासांसाठी पैसे मिळत नाही. मग विकास कसा होणार? असा सवालही त्यांनी केला. मुस्लिम आरक्षणाबद्दलची यांची भूमिका पाहा. मंदिरांची, तिर्थस्थळांची अवस्था काय ते पाहा, अशी टीकाही त्यांनी केली.
संबंधित बातम्या:
एमआयएम ही भाजपची बी टीमच, आघाडी नाहीच, CM Uddhav Thackeray यांनी एमआयएमचा प्रस्ताव धुडकावला
